Sheteldik týrıster qarjyny qalaı jumsaıdy

ASTANA. KAZINFORM - Qazaqstanǵa keletin sheteldik qonaqtar óz aqshalarynyń úshten birin qoǵamdyq tamaqtaný salasyna baǵyttaıdy. Basqa memleketterden keletin saıahatshylardyń shyǵyn qurylymy jergilikti ashanaǵa, qonaqjaılylyqqa jáne taýarlarǵa degen qyzyǵýshylyǵyn kórsetedi.

Kazakh Tourism kompanııasy shetelden kelýshilerdiń ortasha shyǵyndary boıynsha statıstıkalyq málimetterdi taldady.

Derekterge sáıkes, orta eseppen sheteldik týrıster óz qarajattarynyń basym bóligin nemese 27 aıyzyn Qazaqstannyń meıramhanalary men dámhanalarynda tamaqtanýǵa jumsaıdy. Bul olardyń jergilikti gastronomııaǵa jáne qoǵamdyq tamaqtaný mádenıetiniń damýyna degen qyzyǵýshylyǵyn bildiredi.

Shyǵyndardyń 23% ornalastyrý oryndarynda turýǵa baǵyttalady. Bul qonaqúı qyzmetterine degen suranysty kórsetedi.

Qarjynyń taǵy 23% sheteldik meımandar azyq-túlik, kádesyılar jáne ulttyq óndiristiń buıymdary tárizdi tutyný taýarlaryn satyp alýǵa jumsaıdy.

Sheteldik qonaqtar shyǵyndarynyń 12% jýyǵy áýe tasymalyna tıesili. Olar 4% bıýdjetin kólik jaldaýǵa jumsap, elimizdiń kórikti jerleri men tabıǵı landshafttarymen tanysady. Aqshanyń taǵy 4% sporttyq jáne rekreatsııalyq qyzmetterge qatysýǵa jumsalady. Onyń ishinde mádenı jáne sporttyq is-sharalar bar.

Sonymen birge orta eseppen 3% shyǵyn zergerlik áshekeıler, óner týyndylary jáne antıkvarıat tárizdi qundy buıymdardy Qazaqstanda satyp alýǵa baǵyttalady.

«Sheteldik meımandardardyń elimizde jumsaıtyn qarajat qurylymy týrızm ındýstrııasynyń shaǵyn jáne orta bıznestiń, sondaı-aq qyzmet kórsetý salalarynyń damýyna qosatyn úlesin kórsetedi», - dep atap ótti «Kazakh Tourism» UK» AQ Basqarma tóraǵasynyń mindetin atqarýshy Danıel Serjanuly.

Osyǵan deıin Qazaqstannyń medıtsınalyq týrızmdi damytatyny týraly jazdyq.