Sheteldik týrıster qarajatynyń 50 paıyzyn jatyn orynǵa jumsaıdy

ALMATY. KAZINFORM – Almaty - elimizdegi basty týrıstik ortalyqtardyń biri. Ótken jyly megapolıske jarty mıllıonǵa jýyq sheteldik týrıst kelgen. Osy oraıda, Kazinform tilshisine qalalyq Týrızm basqarma basshysynyń orynbasary Aqmaral Eşanova shahardyń týrıstik áleýeti týraly aıtyp berdi.

Onyń aıtýynsha, Almatyǵa sheteldik týrısterdi tartý qalanyń jáne aımaqtyń ekonomıkalyq damýy úshin óte mańyzdy.

- Týrıster Almatyny demalys orny retinde tańdaýy jergilikti ekonomıkanyń ósýine belsendi yqpal etedi. Atap aıtsaq, týrızm - Almatydaǵy eń negizgi jumys salalarynyń biri. 2023 jyldyń tórtinshi toqsanyndaǵy málimetterge sáıkes, týrıstik salada 80 983 adam jumyspen qamtylǵan, bul qalanyń jalpy jumyspen qamtylǵan halqynyń 7,7%-y. Sońǵy birneshe jyl ishinde bul kórsetkish turaqty túrde ósip keledi. 2019 jyly 67 493 adam jumyspen qamtylǵan bolatyn. Jumys oryndarynyń kóbeıýi myńdaǵan otbasyǵa turaqty tabys berip qana qoımaı, aımaqtaǵy jumyssyzdyq deńgeıin tómendetýge de yqpal etti, - dedi Aqmaral Eşanova.

Sondaı-aq ol Almatyǵa kelgen sheteldik týrıster qarajatyn negizinen qonaq úıge jumsaıtynyn aıtty.

- Mastercard derekteri boıynsha, sheteldik týrıster Almatyda qarajatynyń 49%-yn turǵyn úıge jumsaıdy. Almatyǵa kelgen árbir sheteldik týrıst qalanyń ekonomıkalyq damýyna aıtarlyqtaı úles qosyp, jańa jumys oryndaryn qurýǵa, jergilikti salalardy qoldaýǵa jáne halyqtyń ómir súrý deńgeıin arttyrýǵa yqpal etedi. Almatyǵa týrısterdi tartý – aımaqtyń turaqty damýy men gúldenýin qamtamasyz etetin qala bolashaǵyna salynǵan eń úlken ınvestıtsııa desek artyq aıtpaımyz, - dedi basqarma basshysynyń orynbasary.

Aqmaral Eşanova týrıster sanynyń artýy jańa qonaq úıler qurylysynyń kóbeıýine yqpal etip jatqanyn atap ótti. Týrızm basqarmasynyń málimetine sáıkes, qazirgi ýaqytta Almatyda 3 868 bólmege arnalǵan 27 qonaq úıdiń qurylysy júrip jatyr. 2027 jylǵa qaraı qaladaǵy qonaq úılerdiń sany 1,5 esege artyp, 17 myń bólmege jetedi dep josparlanǵan.

Sonymen qatar Almaty qalasy Týrızm basqarmasynyń ókili megapolıske tek kórshi memleketterden ǵana emes, alys shetelden keletin týrısterdiń sany artqanyn málimdedi. Onyń aıtýynsha, AQSh-tan kelgen týrısterdiń sany ótken jylmen salystyrǵanda 66,7% artqan.

- Qalamyzda álemniń túkpir-túkpirinen jınalǵan týrıster óte kóp. Ulttyq statıstıka bıýrosy málimetine sáıkes, bıyl jarty jylda Almatyǵa Reseı, Qytaı, Úndistan, Túrkııa jáne AQSh týrısteri jıi saıahattaǵan. Tizimde kósh bastap turǵan reseılik týrısterdiń úles sany 35,9 myń, odan keıin Úndistan men Qytaıdan kelgen týrıster tur. Bestikti Túrkııa (8,6 myń) jáne AQSh (4.9 myń) azamattary qorytyndylaıdy. Bul qalamyzdyń halyqaralyq arenada tanymal jáne bedeldi týrıstik baǵytqa aınalyp kele jatqanyn rastaıdy, - dedi ol.

Aqmaral Eşanova sóz sońynda osy jyldyń 1-toqsanynda týrızm salasynan túsken salyq 21,7 mlrd teńgege jetkenin atap ótti.

Eske salaıyq, Almatyda halyqaralyq Almaty Food Fest 2024 festıvali ótti.