Sheteldik týrıster Ázerbaıjanda demalysqa az aqsha jumsaı bastady
ASTANA. KAZINFORM — Ázerbaıjanǵa týrızm maqsatynda kelgen sheteldik azamattardyń shyǵyndary 2026 jyldyń qańtarynan maýsymyna deıin 715,9 mln AQSh dollaryn qurady, bul ótken jyldyń sáıkes kezeńimen salystyrǵanda 21%-ǵa az, dep habarlaıdy Memlekettik statıstıka komıteti.
Shyǵyndardyń eń kóp úlesin kólik qyzmetteri qurady — 325,9 mln dollar, bul jyldyq mánde 22%-ǵa az. Sheteldik ornalastyrý qyzmetterine 130,6 mln AQSh dollaryn jumsady, shyǵyn 30%-ǵa qysqarǵan.
Azyq-túlik pen sýsyndarǵa jumsalǵan shyǵyn 19%-ǵa tómendep, 132,4 mln dollardy qurady. Sheteldik qonaqtar mádenı is-sharalar men ekskýrsııalarǵa 4,1 mln AQSh dollaryn jumsady, bul 2025 jyldyń birinshi jartyjyldyǵymen salystyrǵanda 21,3%-ǵa tómen.
Statıstıkaǵa sáıkes, bıylǵy jyldyń qańtar-maýsym aılarynda saıahat paketterine jumsalǵan shyǵyn kólemi 18,2%-ǵa tómendep, 335 800 AQSh dollaryn qurady.
Sonymen qatar sheteldik týrısterdiń sporttyq jáne oıyn-saýyq qyzmetterine jumsaıtyn shyǵyndary artty. Alǵashqy alty aıda bul qyzmetterge 5,6 mln dollar jumsaldy, bul ótken jylmen salystyrǵanda 3,4%-ǵa kóp.
Memlekettik statıstıka komıtetiniń málimetinshe, 2026 jyldyń birinshi jartysynda Ázerbaıjanǵa shamamen 1,92 mln sheteldik azamat kelgen. Kelýshilerdiń eń kóp aǵyny Reseı, Túrkııa, Iran, Grýzııa jáne Qazaqstannan kelgen.
