Sheteldik týrıst Almaty taýlarynan zembilmen túsirildi
ASTANA. KAZINFORM – Almaty qalasy Qutqarý qyzmetiniń mamandary Shymbulaq taý-shańǵy kýrortynan joǵary ornalasqan Bogdanovıch muzdyǵynda, teńiz deńgeıinen shamamen 3300 metr bıiktikte sheteldik týrısterge kómek kórsetti.
Qutqarý qyzmetiniń málimetinshe, oqıǵa týraly aqparat kúnniń ekinshi jartysynda kýrorttyń kúzet qyzmetkerinen túsken. Qytaı Halyq Respýblıkasynyń azamattary – eki er adam men 27 jastaǵy áıel bıik taýly aımaqta qalyp qoıyp, óz betterinshe tómen túse almaǵan.
Áıel basynan jaraqat alyp, qan ketkeni anyqtalyp, oǵan shuǵyl kómek qajet bolǵan.
Oqıǵa ornyna bir tehnıkamen jabdyqtalǵan bes adamnan turatyn qutqarýshylar toby dereý jiberildi. Mamandar zardap shekken áıelge dárigerge deıingi alǵashqy kómek kórsetip, arnaıy zembil arqyly muzdyqtan evakýatsııalaýǵa kiristi.
Buǵan deıin Almaty mańyndaǵy taýlarda aıaǵy synǵan týrıst qutqarylǵany habarlanǵan bolatyn.
Sondaı-aq jýyrda Almaty taýlarynda qutqarýshylardyń kezekshiligi kúsheıtilgeni aıtylǵan edi.
