Sheteldik stýdentter úshin kópmártelik elektrondy vıza engiziledi

ASTANA. KAZINFORM – Sheteldik stýdentter úshin jańadan kópmártelik elektrondy vıza engiziledi. Bul týraly QR Ǵylym jáne joǵary bilim mınıstri Saıasat Nurbek aıtty.

— Qazaqstanda jetekshi sheteldik ýnıversıtetterdiń 40 fılıaly ashylyp jatyr. Búginde elimizde 31 500 sheteldik stýdent bilim alýda – tarıhı rekord. Maqsat — bul sandy 2029 jylǵa qaraı 150 000-ǵa jetkizý. Ol úshin sheteldik stýdentterge, sondaı-aq ǵalymdar, professorlarǵa, mamandarǵa vıza berý tártibin qaıta qarastyrýymyz qajet. Sheteldik stýdentter úshin kópmártelik elektrondy vıza jańadan qarastyrylady, - dedi mınıstr Úkimet otyrysynda.

Onyń aıtýynsha, elimizdiń kóshi-qon saıasaty tujyrymdamasynda suranysqa ıe mamandyqtar boıynsha vızalardy engizý qarastyrylǵan. Mundaı vızalar ǵylym, bilim, tehnologııalar salalarynda qundy daǵdylary bar sheteldik mamandarǵa jáne etnıkalyq qazaqtarǵa beriledi.

— Halyqaralyq tájirıbe kórsetkendeı, mundaı múmkindikter kóp elde bar. Mysaly, Kanadada túlekterge 1 jyldan 3 jylǵa deıin jumys isteýge ruqsat beretin qujat bar. Dýbaıda sheteldik stýdentter uzaq merzimdi vızalar alady, al úzdik stýdentterge arnaıy «Altyn vıza» beriledi. Máskeýde stýdentterge «Máskeýlik karta» jumys isteıdi, - dedi Saıasat Nurbek.

Aıta keteıik, keshe Memleket basshysy Joldaýynda shetelden elimizdi damytýǵa úles qosa alatyn myqty mamandardy ultyna qaramaı tartý týraly tapsyrma bergen bolatyn.