Sheteldik stýdentter sanyn 100 myńǵa deıin arttyramyz – Saıasat Nurbek
ASTANA. KAZINFORM — Bul maqsatqa sheteldik joǵary oqý oryndarynyń fılıaldaryn damytý arqyly qol jetkizý kózdelip otyr. Bul týraly Ǵylym jáne joǵary bilim mınıstri Saıasat Nurbek Jibek Joly radıosyna bergen suhbatynda aıtty.
Qazirgi ýaqytta Qazaqstandaǵy ýnıversıtetter fılıaldarynda 35 myńnan astam sheteldik stýdent bilim alyp jatyr, endi bul kórsetkishti 100 myńǵa deıin arttyrý josparlanyp otyr.
Mınıstrdiń aıtýynsha, sheteldik stýdentter sanynyń artýy jetekshi sheteldik JOO bólimshelerin ashýmen, sondaı-aq qazaqstandyq bilimniń tartymdylyǵyn arttyrýmen tikeleı baılanysty.
— Bul bastama Qazaqstan Prezıdentiniń tikeleı tapsyrmasymen bastaldy. Bizdiń aldymyzǵa úlken mindet qoıyldy: keminde bes jetekshi sheteldik ýnıversıtetti zerttep, olardyń fılıaldaryn Qazaqstanda ashý. Alaıda biz tek 5 JOO-men shektelmeı, ár óńirde memlekettik ýnıversıtetter bazasynda fılıaldar ashýdy maqsat ettik, — dedi Saıasat Nurbek.
Sonymen birge, sala mınıstri otandyq ýnıversıtetterdi transformatsııalaý mindeti qatar sheshilip jatqanyn atap ótti.
— Ekinshi maqsat — jergilikti ýnıversıtetterdi halyqaralyq standarttarǵa saı jańǵyrtý. Fılıal ashardan buryn 5-10 jyl boıy zertteý jáne beıimdeý jumystary júrgiziledi. Mysaly, Heriot-Watt University Jubanov ýnıversıtetimen tórt jyldan beri yntymaqtasyp keledi, al bes jyldan keıin ol tolyǵymen ózgeredi, — dedi mınıstr.
Oǵan qosa, daryndy jastardy óz elimizde alyp qalý da mańyzdy baǵyt bolyp qala beredi.
— Qazirgi tańda úzdik oqýshylar jıi shetelge ketedi: Nazarbaev zııatkerlik mektebiniń túlekteri álemniń 17 jetekshi ýnıversıtetinen shaqyrtý alady, al «Nurorda» oqýshylaryna 36 usynys túsedi. Bul árıne maqtanarlyq jaǵdaı jáne Qazaqstannyń adamı kapıtalynyń joǵary deńgeıiniń kórsetkishi. Biraq ony joǵaltyp alý qaýpi bar. Sondyqtan biz talanttardy elde qaldyrýǵa tyrysamyz, — dep atap ótti Saıasat Nurbek.
Mysal retinde spıker Astanadaǵy Kardıff ýnıversıtetiniń fılıalyn atap ótti. Onda qazirdiń ózinde 317 stýdent bilim alyp jatyr, olardyń ortasha IELTS baly 7,5-ten asady. Bul adamı kapıtaldy el ishinde saqtaýǵa múmkindik beredi.
Granttar týraly suraqqa jaýap retinde Saıasat Nurbek olardyń sany ózgerissiz qalatynyn aıtty.
— Sońǵy bes jylda biz granttar sanyn eki esege arttyrdyq. Ótken jyly 90 myńnan astam grant bólindi. Bul deńgeı turaqty saqtalady, — dedi ol.
2026 jyly bakalavrıatqa shamamen 72 myń grant bólinedi, ásirese ınjenerlik-tehnıkalyq baǵyttarǵa, pedagogıkaǵa jáne IT salasyna basymdyq beriledi. Mınıstrdiń aıtýynsha, buǵan sebep — pedagog kadrlarǵa áli de suranystyń joǵary bolýy, al IT men jasandy ıntellekt — bolashaqtyń strategııalyq tehnologııalary.
Buǵan deıin S. Nurbek joǵary oqý oryndarynyń ulttyq reıtıngi engiziletinin aıtqan edi.
