Sheteldik stýdentter Qazaqstanǵa 30 mlrd tg tabys ákeldi — Saıasat Nurbek

ASTANA. KAZINFORM — Qazaqstandy Eýrazııanyń bilim jáne ǵylym ortalyǵyna aınaldyrýǵa baǵyttalǵan aýqymdy joba jalǵasyp jatyr. Bul týraly QR Ǵylym jáne joǵary bilim mınıstri Nıý-Iorkte ótken BUU-nyń Assambleıasynda Kazinform agenttiginiń tilshisine habarlady.

— Álemdik ozyq ýnıversıtetterdiń Qazaqstanda belsendi jumys isteýi — bilim júıesin jańartýǵa qosqan úles qana emes, eldiń ekonomıkalyq damýy men jahandyq bedelin arttyrýdyń mańyzdy tetigi, — deıdi Saıasat Nurbek.

3 qyrkúıekte Astanada Ulybrıtanııanyń bedeldi ýnıversıtetiniń fılıaly — Cardiff University Kazakhstan kampýsy ashylǵan edi.

Mundaı jańa jobalar aldaǵy ýaqytta da jalǵasady. Máselen, 14 qazanda astanadaǵy L. N. Gýmılev atyndaǵy Eýrazııa ulttyq ýnıversıtetiniń bazasynda MGIMO ýnıversıtetiniń fılıaly iske qosylady. Oǵan 100 memlekettik grant bólingen. Dál sol aıda 2300 orynǵa arnalǵan ońtústik koreıalyq Woosong ýnıversıtetiniń kampýsy da ashylady. Túrkistanda bilim beretin ınnovatsııalyq kampýs jasandy ıntellekt pen kıberqaýipsizdik baǵdarlamalaryn usynady.

— 2024 jyly Qazaqstanda 31,5 myń sheteldik stýdent oqydy. Bul búkil tarıhtaǵy rekordtyq kórsetkish ekonomıkaǵa 30 mıllıard teńgeden astam tabys ákeldi. Jáne shamamen 40 myń jumys ornyn qurýǵa yqpal etti. Birinshi ret Azııa elderinen kelgen stýdentter sany TMD elderinen kelgen stýdentter sanynan asyp ketti. Eń kóp stýdent Úndistan, Qytaı jáne Pákistannan, — dedi mınıstr.

Saıasat Nurbektiń aıtýynsha, 2029 jylǵa qaraı Qazaqstan sheteldik stýdentterdiń sanyn 100 myńǵa deıin jetkizýdi josparlap otyr. Osylaısha bilim berý qyzmetteriniń eksporty 400 mlrd teńgege deıin artpaq. Bul úshin sheteldik ýnıversıtetterdiń fılıaly belsendi túrde ashylyp jatyr. Olardyń 85%-y ulttyq ekonomıka basymdyqtaryna sáıkes tehnıkalyq jáne IT salasyna baǵdarlanǵan.

Sonymen qatar, ınfraqurylymnyń damýy da qatar júrip jatyr. Sońǵy jyldary jataqhana tapshylyǵy 82,5 myńnan 15 myńǵa deıin qysqartyldy, Astanada rekordtyq 2656 oryndyq jataqhana paıdalanýǵa berildi, al Almatyda bıyl 4280 orynǵa arnalǵan jańa kampýs ashylady.

Bilim salasynyń sarapshylary sheteldik ýnıversıtet fılıaldarynyń ashylýy men sheteldik stýdentter sanynyń ósýin bilim salasyndaǵy ilgerileý ǵana emes, Qazaqstannyń álemdik arenadaǵy ımıdjin nyǵaıtýǵa da oń yqlal etedi dep baǵalap otyr.

Elimizde Ulybrıtanııa, Italııa, Ońtústik Koreıa jáne Reseı ýnıversıtetteriniń ashýy Qazaqstanǵa artylǵan senimdi kórsetedi. Nátıjesinde jastarǵa shetelge barmaı-aq sapaly bilim alý múmkindigin ashady.

Aıta keteıik, búgin ShQO-da Qazaqstan men Germanııa ýnıversıtetteriniń Konsortsıýmyna qol qoıyldy.