Sheteldik sportshylardy bıýdjetten qarjylandyrýǵa tyıym salyndy — Senat
ASTANA. KAZINFORM — Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine dene shynyqtyrý jáne sport, sondaı-aq artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy.
— Zań dene shynyqtyrý jáne sport salasyndaǵy zańnamany odan ári jetildirý, sondaı-aq ákimshilik reformanyń ekinshi kezeńin iske asyrý aıasynda ortalyq jáne jergilikti atqarýshy organdar arasyndaǵy quzyretterdiń arajigin ajyratý maqsatynda ázirlengen, — dedi senator Ásem Rahmetova.
Zańmen 2 kodekske, 5 zańǵa kelesi jańalyqtardy qamtıtyn túzetýler engizilip otyr:
— basym sport túrlerin olardyń reıtıngi negizinde emes, Olımpıada, Paralımpıada, Sýrdlımpıa, Azııa jáne Para Azııa oıyndarynda ulttyq qurama komandalardyń óner kórsetý nátıjeleri boıynsha qalyptastyrý;
— respýblıkalyq jáne óńirlik sport federatsııalaryn ulttyq sport federatsııalaryna ózgertý;
— joǵary jetistikter sportyna jatatyn basym sport túrlerin birinshi kezektegi tártippen qarjylandyrýdy júzege asyrý;
— sporttyń oıyn túrleri boıynsha kásibı sport klýbtaryn ustaýǵa lımıtter belgileý;
— Qazaqstan Respýblıkasynyń azamattary sanalmaıtyn sportshylardy bıýdjet qarajaty esebinen qarjylandyrýǵa tyıym salý;
— sport federatsııalaryn akkredıtteýge qatysty talaptar belgileý;
— akkredıttelgen sport federatsııalaryna dinı ekstremızm men terrorızmniń aldyn alý jóninde sharalar qabyldaý mindetin belgileý;
— biryńǵaı operatordyń qarjysyna sport ınfraqurylymy obektilerin salýǵa múmkindik berý;
— ýákiletti organ respýblıkalyq memlekettik dene shynyqtyrý-sport uıymdarynyń birinshi basshylaryn, jergilikti atqarýshy organdar jergilikti memlekettik dene shynyqtyrý sport uıymdarynyń birinshi basshylaryn rotatsııalaýdy iske asyrý.
— Sport is-sharalaryna jáne halyqaralyq sport jarystaryna jiberý kezinde birinshi toptaǵy múgedektigi bar sportshyny alyp júretin adamnyń shyǵyndaryn óteý jónindegi zańnamalyq talap belgilendi. Budan basqa, sport medıtsınasyn damytýǵa baǵyttalǵan normalar kózdelgen. Sportshylardyń mamandandyrylǵan medıtsınalyq kómegin qamtamasyz etý, sondaı-aq sport medıtsınasyn jáne ońaltý salasynda zamanaýı tehnologııalardy engizý maqsatynda ulttyq sport medıtsınasy ári ońaltý uıymyn memlekettik kásiporyn nysanynda qurý usynylady. Zańmen sportshylar men jattyqtyrýshylarǵa Memlekettik áleýmettik qoldaý kórsetý tártibine de ózgerister engizildi, — dedi depýtat.
Onyń sózine qaraǵanda, Qazaqstan azamaty sanalatyn jáne elimiz aýmaǵynda dene shynyqtyrý jáne sport salasynda keminde jıyrma jyl eńbek ótili bar, Olımpıada, Paralımpıada, Sýrdlımpıada oıyndarynyń chempıondary men júldegerleri nemese olımpıadalyq sport túrleri boıynsha álem chempıondary ataqtaryn jeńip alǵan sportshylardy daıyndaǵan jattyqtyrýshylar materıaldyq qamtamasyz etiledi.
Budan basqa, zań normalarymen ákimshilik reformanyń ekinshi kezeńi aıasynda ortalyq jáne jergilikti atqarýshy organdar arasyndaǵy quzyretterdi ajyratýǵa qatysty túzetýler kózdelgen.
Buǵan deıin Qazaqstanda sport federatsııalarynyń qyzmetinde ózgeris bolatynyn jazǵan edik.