Sheteldik sarapshylardy qazaqy tazynyń qaı qasıeti qyzyqtyrady
ASTANA. KAZINFORM — Sońǵy jyldary qazaqy tazyǵa sheteldik kınologtar men ıt ósirýshilerdiń qyzyǵýshylyǵy artyp keledi. Mamandardyń aıtýynsha, halyqaralyq kórmelerge turaqty qatysý men tuqymnyń keńinen nasıhattalýy onyń álemdik deńgeıde tanylýyna jol ashyp otyr.
Jibek Joly telearnasynyń «Búgin.LIVE» baǵdarlamasynda Kınologtar odaǵynyń basshysy Baýyrjan Serikqalıuly qazaqy tazyny halyqaralyq deńgeıde tanytý baǵytyndaǵy jumystar týraly aıtty.
Onyń sózinshe, 2024 jyldyń qyrkúıeginde qazaqy tazy Halyqaralyq kınologııa federatsııasynan aldyn ala moıyndaý alǵan. Endi aldaǵy birneshe jyl ishinde tuqymnyń sany, densaýlyǵy, genetıkalyq turaqtylyǵy men sapasyna qatysty talaptar oryndalýy tıis.
— Bizdiń basty maqsatymyz kórmeden júlde alý emes, qazaqy tazyny tolyq halyqaralyq deńgeıde moıyndatý. Qazir shetelden kelip, bul tuqymdy qaıdan alýǵa bolatynyn suraıtyndar kóbeıdi. Bul qazaqy tazyǵa degen qyzyǵýshylyqtyń artyp kele jatqanyn kórsetedi, — deıdi Baýyrjan Serikqalıuly.
Mamannyń aıtýynsha, sońǵy jyldary qazaqstandyq kınologtar halyqaralyq kórmelermen qatar arnaıy tanystyrý jumystaryn da kúsheıtken. Máselen sheteldik sarapshylarǵa arnalǵan dárister uıymdastyrylyp, qazaqy tazynyń standarttary, minez erekshelikteri men ańshylyq qasıetteri tanystyrylǵan.
Sheteldik sarapshylardy ásirese tazynyń densaýlyǵy qyzyqtyrady. Tabıǵı suryptalý arqyly qalyptasqan tuqym bolǵandyqtan, kóptegen jasandy jolmen alynǵan ıtterde kezdesetin genetıkalyq aýrýlar qazaqy tazyda múlde bolmaıdy.
Sonymen qatar tazynyń minezi men ańshylyq qabileti de erekshelenedi. Kúndelikti ómirde baısaldy ári sabyrly kóringenimen, ańshylyq kezinde onyń tabıǵı ınstınkteri tolyq ashylady.
— Tazynyń ereksheligi de osynda. Úıde nemese kórmede óte tynysh júredi. Biraq dalada ań kórse, minezi birden ózgeredi. Maqsatyna jetkenshe toqtamaıdy. Al degenine jetken kezde qaıta sabyrly qalpyna keledi. Sarapshylardyń qyzyǵatyny da osy qasıeti, — deıdi Baýyrjan Serikqalıuly.
Mamannyń aıtýynsha, qazaqy tazyny halyqaralyq deńgeıde tanytý jumystary aldaǵy jyldary da jalǵasady. Óıtkeni tuqymnyń tolyq moıyndalýy tek kórme nátıjelerimen emes, uzaq merzimdi selektsııalyq jáne ǵylymı jumystarmen tikeleı baılanysty.
Eske sala keteıik, 2-7 maýsym aralyǵynda Italııanyń Bolonıa qalasynda álemdegi eń bedeldi kınologııalyq forýmdardyń biri — World Dog Show 2026 kórmesi ótken bolatyn.
Bul kórmede jas qazaqy tazy Chelsı úzdik ıtterdiń tórttigine endi. Chelsıdiń ıesi Italııadaǵy jeńis týraly aıtyp bergen edi.
