Sheteldik sarapshylar Quryltaı saılaýynyń mańyzy týraly pikir bildirdi
ASTANA.KAZINFORM - Sheteldik baqylaýshylar Qazaqstanda ótip jatqan Quryltaı saılaýynyń mańyzy, onyń eldiń saıası damýy men turaqtylyǵyn saqtaýdaǵy róli týraly aıtyp berdi.
Shveıtsarııa ókili, quqyq qorǵaýshy jáne «Geneva Times» jýrnalısi Mýız Vahabdın daýys berý protsesi týraly óz pikirimen bólisti.
-Vahabdın myrza, sizdiń Jenevadaǵy BUU-nyń adam quqyqtary jónindegi is-sharalarǵa qatysýda tájirıbeńiz mol ekeni belgili. Qazaqstandaǵy Quryltaı saılaýynyń barysyn qalaı baǵalaısyz?
-Eń aldymen, men halyqaralyq saılaý baıqaýshysy retinde Qazaqstanǵa kelgenime qýanyshtymyn. Bizdiń rólimiz óte qarapaıym: baqylaý, tyńdaý jáne táýelsiz ári beıtarap bolý. Men Qazaqstannyń bir palataly parlamentine saılaý Qazaqstan halqy úshin óte mańyzdy dep sanaımyn. Óıtkeni bul saılaý adamdarǵa óz tańdaýyn bildirýge múmkindik beredi. Árıne, saılaý eldiń bolashaǵyn anyqtaıdy. Osyǵan baılanysty biz, halyqaralyq baıqaýshy retinde, beıbit, ashyq jáne senimdi saılaý protsesin kórgimiz keledi. Qazaqstan halqyna saılaýdyń sátti ótýin tileımin.
Shveıtsarııa beıtarap el jáne álem boıynsha kóptegen beıbitshilik kelissózderin ótkizedi. Men Qazaqstannyń geografııalyq ornalasýy, saıası qurylymy jáne myqty demokratııalyq negizi arqasynda beıbitshilik pen turaqtylyq alańyna aınalý múmkindigi bar dep sanaımyn. Sondyqtan men Qazaqstannyń jahandyq saıasatta mańyzdy ról atqara alatynyna senimdimin,- dedi ol.
«EU alive» basylymynyń eýropalyq jýrnalısi Georgıı Gotev ta daýys berý protsesi týraly óz pikirimen bólisti.
— Gotev myrza, siz saılaý týraly aqparat taratý isine birinshi ret qatysyp turǵan joqsyz. Siz uzaq ýaqyt boıy bedeldi eýropalyq EUractive basylymyn basqardyńyz. Qazirgi Quryltaı saılaýy týraly oıyńyz qandaı?
— Iá, men buǵan deıin de Qazaqstandaǵy saılaýlar týraly aqparat tarattym jáne birneshe aı buryn referendýmǵa da qatystym. Men bul saılaýdyń mańyzdylyǵyn túsinemin, óıtkeni Qazaqstan kúrdeli geosaıası jaǵdaıda tur... Qazir Qazaqstanǵa myqty bolyp, mańyzdy qadamdar jasaýǵa týra keledi. Mine, sondyqtan Prezıdent Qasym-Jomart Toqaev konstıtýtsııalyq ózgerister men bir palataly parlament, sondaı-aq vıtse-prezıdent bastamasyn bastady. Bul, árıne, onyń «Jańa Qazaqstandy» qurý boıynsha strategııalyq jospary. Árıne, eń bastysy, eldiń tabysty damýyn jalǵastyrýy. Bıznes pen sheteldik ınvestorlar úshin turaqtylyqty saqtaý óte mańyzdy, sondaı-aq meniń oıymsha, Qazaqstan turaqtylyqtyń sımvolyna aınalyp keledi.
— EO-Qazaqstan qarym-qatynasy jáne olardyń bolashaǵy týraly sizdiń oıyńyz qandaı?
— Meniń oıymsha, Eýropalyq Odaq Qazaqstanmen qarym-qatynasty tek saıası turǵydan ǵana emes, sonymen qatar ekonomıkalyq turǵydan da damytýǵa óte múddeli, ásirese qazir, EO kóptegen salalarda strategııalyq avtonomııaǵa qol jetkizýge tyrysyp jatqan tusta. Eýropalyq Odaqqa mańyzdy shıkizat qajet, al Qazaqstanda osy resýrstardyń barlyǵy bar. Eýropalyq Odaq, árıne, belsendirek bolýy kerek. EO elderiniń kompanııalary AQSh, Qytaı jáne basqa aımaqtardyń ınvestorlarynan artta qalmaýy kerek. Qazirgi saılaý shynymen de turaqtylyq týraly. Eýropalyq Odaq úshin turaqtylyqtan artyq eshteńe joq. Turaqty Qazaqstan men turaqty Eýropalyq Odaq qarym-qatynastaryn áldeqaıda jaqsy damyta alady. Sondyqtan qazir de saılaý ýchaskesinde mýzyka estilip, merekelik atmosfera seziledi. Bunyń ózi myń sózden artyq, kóp nárseni bildiredi.
Buǵan deıin fılıppındik baıqaýshy Qazaqstandaǵy saılaýda erekshe ınklıýzıvti jaǵdaı jasalǵanyn atap ótti.
