Sheteldik patsıentterge arnalǵan medıtsınalyq týrpaketter ázirlendi
ASTANA. KAZINFORM – 2027-2030 jyldarǵa arnalǵan medıtsınalyq týrızmdi damytý jónindegi vedomstvoaralyq jospar ázirlendi. Bul týraly Quryltaı depýtattarynyń saýalyna Premer-mınıstr Oljas Bektenovtiń jaýabynda aıtylǵan.
- Sheteldik emdelýshilerdi tartý maqsatynda sapaly servısti qamtıtyn medıtsınalyq, sanatorıılik-kýrorttyq jáne ońaltý qyzmetteriniń paketteri (medıtsınalyq jáne sanatorıılik-kýrorttyq uıym, transfer, turý, tamaqtaný, aýdarmashy, onyń ishinde alyp júretin adamdar úshin, praıs-paraqtar) ázirlendi. Olardy týrıstik agenttikter men elshilikter arqyly medıtsınalyq vızany paıdalanýdy eskere otyryp, ilgeriletý kózdelgen. Patsıenttiń bastapqy ótinishinen bastap emnen keıingi súıemeldeýge deıin tolyqqandy qyzmet kórsetý marshrýtyn qalyptastyrý kózdelip otyr. Oǵan medıtsınalyq uıymdar, týroperatorlar jáne servıstik kompanııalar tartylady, - dedi Oljas Bektenov.
Úkimet basshysynyń atap ótýinshe, medıtsınalyq týrızmdi damytýdyń júıeli tásilin qamtamasyz etý maqsatynda negizgi uǵymdardy bekitýdi, ýákiletti organdar men qatysýshylardyń quzyretterin naqtylaýdy, sondaı-aq olardyń ózara is-qımylyn úılestirýdi kózdeıtin zańnamalyq túzetýler ázirlengen.
- Sondaı-aq 2027-2030 jyldarǵa arnalǵan medıtsınalyq týrızmdi damytý jónindegi vedomstvoaralyq jospardyń jobasy ázirlendi. Ol normatıvtik quqyqtyq bazany, statıstıkalyq esepti, qyzmet kórsetý standarttaryn jáne qatysýshylardyń ózara is-qımyl tetikterin jetildirý, sondaı-aq ǵylymı medıtsınalyq ortalyqtar men ınstıtýttarda medıtsınalyq týrızmdi damytý boıynsha is-sharalardy kózdeıdi, - dedi Premer-mıınstr.
Aıta keteıik, elimizde emdelý quny Eýropa, Soltústik Amerıka, Ońtústik Koreıa jáne Parsy shyǵanaǵy elderine qaraǵanda aıtarlyqtaı tómen.
