Sheteldik onlaın-dúkender QQS boıynsha shartty esepke qoıylady – Komıtet

ASTANA. KAZINFORM — Qazaqstanda sheteldik kompanııalardy qosylǵan qun salyǵy (QQS) boıynsha boıynsha shartty tirkeý mehanızmi engizildi. Bul qazaqstandyqtarǵa taýar satatyn nemese elektrondy qyzmetter kórsetetin sheteldik onlaın-dúkender men servısterge qatysty.

– Shartty túrde esepke qoıýdy salyq organdary júzege asyrady, olar QQS tóleıtin sheteldik kompanııalardyń tizilimin jasaıdy, - dep túsindirdi Memlekettik kirister komıtetiniń QQS ákimshilendirý basqarmasynyń basshysy Edil Ázimshaıyq.

Onyń aıtýynsha, bul mehanızm ınternet arqyly qazaqstandyq naryqta jumys isteıtin sheteldik jetkizýshilerge salyq salý tártibin retke keltirýge múmkindik beredi dep kútilip otyr. 

Reestri júrgizý jáne oǵan engiziletin derekter tizimin aıqyndaý ýákiletti organ quzyretinde bolady.

– Shartty tirkeýden ótý úshin sheteldik kompanııa salyq organyna qajetti málimeti bar rastaý hatyn jiberedi. Muny Qazaqstandaǵy satyp alýshydan alǵashqy tólem túsken kúnnen bastap bir aı ishinde jasaý qajet. Derekter ózgergen jaǵdaıda kompanııa salyq organyn 10 jumys kúni ishinde habardar etýge mindetti, - dedi E. Ázimshaıyq. 

Sheteldik kompanııany QQS tóleýshi retinde taný kúni – satyp alýshynyń alǵashqy tólem jasaǵan kúni bolyp esepteledi. 

– Qazirgi ýaqytta Apple, OpenAI sekildi negizgi, úlken ınternet alańdar tirkelip, 16 paıyz stavkamen salyqtaryn tólep otyr. Sáıkesinshe olarǵa jańa jylda qaıtadan tirkelý mindetti emes. Jańa Salyq kodeksi boıynsha eshbir jańa talap qoıylmaıdy. Eger sheteldik kompanııalar salyǵyn ýaqytynda tólemese, qosymsha ósimpulymen birge tóleıdi. Biz habarlama jibergennen keıin de, salyq tólemese, tirkelmese, ınternet-resýrstarǵa shekteý qoıylyp, buǵattalady, - dep tolyqtyrdy E. Ázimshaıyq.

Buǵan deıin keden jáne salyq jeńildikteri kimge jáne qandaı jaǵdaıda beriletini túsindirilgen edi.