Sheteldik nómirli kólikpen zańsyz júrgenderge qandaı jaýapkershilik qarastyrylǵan
SEMEI. KAZINFORM — Abaı oblysynyń polıtseıleri sheteldik nómirli kólikterdi zańsyz paıdalanǵany úshin qandaı jaýapkershilik qarastyrylǵanyn eske saldy.
Oblystyq Polıtsııa departamentiniń málimetine súıensek, tártip saqshylary Qazaqstan Respýblıkasynyń zań talaptaryn buza otyryp paıdalanylyp júrgen sheteldik tirkeýdegi kólikterdi anyqtaý jumystaryn jalǵastyryp jatyr.
— Osydan 3 jyl buryn Qazaqstanda 2022 jylǵy 1 qyrkúıekke deıin elge ákelingen kólikterdi bir rettik zańdastyrý júrgizildi. Osy naýqan kezinde Abaı oblysynda 14 330 ótinish qabyldanyp, onyń 7 859-y maquldandy. Kólik ıelerine tirkeý kýálikteri berildi. Onyń ishinde 4941 kólik jeńildetilgen tirkeý alymymen zańdastyryldy. 1 402 kólik «konstrýktor» sanatymen tirkelse, 1 517 kólik ýaqytsha esepke qoıyldy. Baǵdarlama aıaqtalǵanyna qaramastan, keıbir azamattar sheteldik nómirli kólikterdi zańsyz paıdalanyp júr, — delingen aqparatta.
Osyǵan baılanysty polıtsııa qyzmetkerleri profılaktıkalyq sharalar ótkizip, mundaı kólikterdi anyqtap, júrgizýshilerge zań talaptaryn túsindirýde jáne zańda kózdelgen sharalardy qoldanýda.
Zań talaptaryn buza otyryp sheteldik tirkeýdegi kólikti basqarǵany úshin ákimshilik jaýapkershilik qarastyrylǵan. Birinshi ret anyqtalǵan jaǵdaıda 10 AEK mólsherinde aıyppul salynady. Eger osy quqyq buzýshylyq bir jyl ishinde qaıta jasalsa, 20 AEK aıyppul nemese 1 jylǵa kólik basqarý quqyǵynan aıyrý jazasy qoldanylady.
Eske salsaq, osyǵan deıin Abaı oblysynda polıtsııanyń júrgizýshilerge erekshe aktsııa uıymdastyrǵany habarlanǵan.
