Sheteldik naýqastar Qazaqstanda qandaı em alady
ASTANA. KAZINFORM — Jyl basynan beri shetelden 80 myńnan astam adam kelip, Qazaqstannyń medıtsınalyq qyzmetterine júgingen.
Densaýlyq saqtaý mınıstri Aqmaral Álnazarova Qazaqstandaǵy medıtsınalyq týrızm áleýeti týraly aıtyp berdi.
Mıınstrdiń aıtýynsha, sheteldik patsıentter sany byltyrǵy jyldarmen salystyrǵanda edáýir ósti.
— Bizdiń keıbir baǵyt boıynsha halyqaralyq deńgeıge jettik dep aıtýǵa bolady. Onyń ishinde kardıohırýrgııalyq operatsııalar, neırohırýrgııalyq, stomatologııalyq qyzmetter sapasy men baǵasy sheteldikterge óte qolaıly bolyp otyr. Sonymen birge, ekstrakorporaldy uryqtandyrý da úlken suranysqa ıe, — dedi Densaýlyq saqtaý mınıstri Aqmaral Álnazarova Úkimet úıinde ótken brıfıngte.
Sheteldikterge qosymsha esh jeńildik qarastyrylmaǵan, degenmen qazaqstandyq memorgandar halyqaralyq jáne el ishindegi reısterdiń ashylýyna baılanysty tıisti jumystardy uıymdastyrady.
— Qazan aıynda Ózbekstanda Qazaqstan medıtsınasy kúnderin ótkizemiz. Ózbekstannyń bes óńirine, onyń ishinde Tashkentke, Qaraqalpaqstanǵa, Buqara men Samarqanǵa mamandarymyz barady. Olar kúrdeli otalar jasap, sheberlik saǵattaryn ótkizedi. Jyl aıaǵyna deıin Tájikstanǵa da osy jumystarmen baramyz. Bul óte úlken baǵyt, áli de damytýdy, qoldaýdy qajet etedi, — dedi Densaýlyq saqtaý mınıstri.
Buǵan deıin Aqmaral Álnazarova dárigerlerdiń naýqasty qaraý ýaqytyn uzartý máselesimen 2024 jyldan beri aınalysyp kele jatqanyn aıtqan edi.