Sheteldik marketpleısterdiń 505 mlrd teńgeniń eksportynan 24 mlrd teńge ǵana salyq tólegeni ras pa

ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarın Májilis depýtatynyń saýalyna joldaǵan jaýapta sheteldik marketpleısterdiń 505 mlrd teńgeniń eksportynan 24 mlrd teńge ǵana salyq tólegeni týraly derekti teriske shyǵardy. 

Depýtattyq saýalda 2023 jyly sheteldik marketpleıster 24,3 mlrd teńge salyq tólegeni aıtylǵan. Al Ulttyq banktiń málimeti boıynsha sol jylda qazaqstandyqtar sheteldik ınternet-dúkenderden satyp alǵan taýarlar quny shamamen 505 mıllıard teńge bolǵan. 

- 505 mıllıardtyń 24 mıllıardy 4,8 paıyz ǵana. Al qosylǵan qun salyǵyn tólegende bul úles 12 protsent bolý kerek. Sonda 500 mlrd teńgeniń qosylǵan qun salyǵy 24 mlrd teńge emes, 60 mlrd teńge bolý kerek edi, - dep jazylǵan saýalda.

Vıtse-premer bul saýalǵa jaýap retinde basqasha esep usynǵan.

- 2023 jyly jeke tulǵalar men qazaqstandyq marketpleıster jasaǵan ımporttyń kólemi 124,8 mlrd teńge bolyp, osynsha kólemge saı salyq pen kedendik baj tólendi. Bul jerde kedendik tólem men salyqtardy ımporttaýshy tulǵa tóleıdi jáne sheteldik marketpleısten qosylǵan qun salyǵy alynbaıdy, - deıdi Serik Jumanǵarın.

Sondaı-aq, ol Ulttyq bank statıstıkasy men Google Tax mádimetteriniń arasyndaǵy aıyrmashylyqtyń sebebin eki faktormen baılanystyrady.

- Transshekaralyq elektrondy saýdaǵa jatatyn taýardyń kólemin aıqyndaý ádistemesinde birizdilik joq. Ulttyq bank málimetteri boıynsha elektrondy saýdany baǵalaǵan kezde mynandaı sıpattar eskeriledi: tólem jasalǵan kartanyń qazaqstandyq bank shyǵarǵan bolý kerek, aýdarylǵan aqsha sheteldik bankte sheshilip alynǵan bolý qajet, tólem ınternet arqyly jasalǵan bolý kerek, MSS kod (saýda núktesine beriletin 4 tańbaly kod – red.) taýar satylymymen sáıkes bolýy shart. Ekinshi deńgeıli bankterdiń Ulttyq bankke aýdarymdar men tólemderi týraly bergen dereginde ár sheteldik marketpleıstiń jasaǵan saýda somasy týraly tolyq aqparat joq. Ár marketpleıske qaıtaryp berilgen taýardyń kólemi, kedendik tólemder týraly aqparat joq, - dep jazady Ulttyq ekonomıka mınıstri. 

Onyń paıymdaýynsha, aıyrmashylyqtyń taǵy bir sebebi sheteldik marketpleısterdi salyq mindettemelerin májbúrlep oryndatý tetikteriniń joqtyǵynda.

- Jańa Salyq kodeksiniń jobasynda salyqty durys tólemegen jáne tirkelmegen sheteldik marketpleısterdiń saıttaryn buǵattaýǵa múmkindik beretin túzetýler engizilgen. Qarjy mınıstrligi Syrtqy ister mınıstrligimen jáne elshiliktermen birge sheteldik marketpleısterdi tirkeý baǵytynda jumys júrgizdi. Osynyń nátıjesinde Alibaba, Pinduoduo, Temu marketpelısteri 2024 jyly tirkeýden ótti, - dep jazady Serik Jumanǵarın.

Jaýapta keltirilgen resmı málimetke sensek, Qazaqstanda 105 sheteldik marketpleıs qosylǵan qun salyǵyn tóleýshi retinde tirkelgen. 

Olar: 

• - Apple, Amazon, Alibaba (1688, lazada, tmall, Taobao); 
• - Aliexpress, Adobe, Ebay, Google, iHerb, Huawei, Meta (Facebook, instagramm); 
• - Netflix, Nintendo, Ozon, Pinduoduo, Temu, TikTok, Samsung, Sony, Zoom.

Bulardyń 44-si 2022 jyly, 19-y 2023 jyly, 35-i 2024 jyly, jeteýi 2025 jyly tirkelgen. 

Memlekettik kirister komıtetiniń mádimeti boıynsha Qazaqstanda tirkelgen 9 negizgi Qytaı marketpleısi bıýdjetke 6 mlrd teńge aýdarǵan.