Sheteldik maman elimizde medıtsınalyq qyzmetpen aınalysý úshin ne isteýi kerek
ASTANA. KAZINFORM – Elimizge medıtsınalyq jáne farmatsevtıkalyq qyzmetti júzege asyrý úshin kelgen shetel azamaty kásiptik daıarlyǵyn baǵalaýdan ótedi. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
– Sheteldik mamandarǵa el aýmaǵynda kásibı medıtsınalyq qyzmetpen aınalasý múmkindigi «Halyq densaýlyǵy jáne densaýlyq saqtaý júıesi týraly» Qazaqstan Respýblıkasy kodeksiniń 27-babynyń 5-tarmaǵyna («Nazarbaev Ýnıversıteti» nemese onyń medıtsınalyq uıymdarynda jáne Qazaqstan Respýblıkasy Prezıdenti Іs basqarmasynyń medıtsınalyq uıymdarynda, al oqytý maqsatynda – joǵary oqý oryndarynda, ulttyq jáne ǵylymı ortalyqtarda, ýnıversıtettik aýrýhanalarda, klınıkalar men rezıdentýra bazalarynda, ǵylymı-zertteý ınstıtýttary men joǵary medıtsınalyq kolledjderde) sáıkes qarastyrylǵan, - dedi Úkimet basshysy jaýabynda.
Premer-mınıstr málimetinshe, joǵaryda atalǵan kodekstiń 27-baby 4-tarmaǵyna sáıkes bilimi týraly tanylǵan qujattary bar sheteldik mamandarǵa medıtsınalyq qyzmetti júzege asyrýǵa múmkindik berilgen.
– Sheteldik mamandar zańǵa sáıkes sertıfıkattaý tártibinen ótýge tıis. Elge medıtsınalyq jáne farmatsevtıkalyq qyzmetti júzege asyrý úshin kelgen shetel azamaty nemese azamattyǵy joq adam kásiptik daıarlyǵyn baǵalaýdan ótedi. Sodan keıin sertıfıkat alý úshin klınıkalyq praktıkaǵa quqyǵy bar sertıfıkattaý rásimine jiberiledi. Rásimderdiń qorytyndysy boıynsha sheteldik maman el aýmaǵynda medıtsınalyq qyzmetti júzege asyrý quqyǵyna ıe bolady, - dedi Oljas Bektenov.
Buǵan deıin senator Bekbol Orynbasarov depýtattyq saýalynda «Ata joly» kartasyn júzege asyrý barysynda anyqtalǵan kemshilikterdi ataǵan edi.
