Sheteldik kórmelerde Almatyny tanystyrýǵa 800 mln teńge jumsalady
ALMATY. KAZINFORM – Týrızm baǵytynda ótetin sheteldik kórmelerde Almatyny tanystyrýǵa qomaqty qarjy jumsalmaq.
Memlekettik satyp alý saıtynda ártúrli qalalarda «Almaty qalasynyń týrızm kúnderi» is-sharasyn ótkizý jónindegi 10 habarlandyrý jarııalanǵan. Olar qatarynda:
1. OTM Mumbai, Úndistan Halyqaralyq týrıstik kórmesine qatysýǵa – 82 451 750 teńge;
2. ATM Dubai halyqaralyq týrıstik kórmesine qatysýǵa – 82 631 500 teńge;
3. SITF Seýl halyqaralyq týrıstik kórmesine qatysýǵa – 81 788 500 teńge;
4. ITB China Shanhaı halyqaralyq týrıstik kórmesine qatysýǵa – 80 388 000 teńge;
5. ITE Hong Kong halyqaralyq týrıstik kórmesine qatysýǵa – 82 828 000 teńge;
6. Malaızııanyń MATTA Fair halyqaralyq týrıstik kórmesine qatysýǵa – 74 294 600 teńge;
7. Tokıo qalasynda Tourism Expo Japan halyqaralyq týrıstik kórmesine qatysýǵa – 86 409 500 teńge;
8. QTM Doha halyqaralyq týrıstik kórmesine qatysýǵa – 78 185 500 teńge;
9. GITF Gýanchjoý halyqaralyq týrıstik kórmesine qatysýǵa – 78 695 500 teńge;
10. ITB Asia Sıngapýr Halyqaralyq týrıstik kórmesine qatysýǵa – 92 125 500 teńge.
Atalǵan kórmelerdi Almaty týrıstik turǵydan tanystyrý jumsalatyn jalpy soma – 800 mln teńgeden asady. Osy oraıda, Kazinform agenttigi Almaty qalasynyń týrızm basqarmasyna saýal joldap, bıýdjet qarajatyna mundaı is-sharalardy uıymdastyrýǵa jumsaý qanshalyqty tıimdi ekenin jáne qandaı nátıje ákeletinin suradyq.
Vedomstvo jaýabyna sáıkes, atalǵan kórmeler álemdik týrıstik naryqtyń negizgi habtarynda ótkiziledi jáne Azııa men Taıaý Shyǵys óńirlerindegi maqsatty týrıstik aýdıtorııany qamtıdy.
Týrızm basqarmasynyń ókilderi bul alańdarda Almaty qalasynyń týrıstik brendi halyqaralyq deńgeıde nyǵaıtylyp, qalanyń mádenı murasy, tabıǵı-rekreatsııalyq resýrstary, iskerlik jáne medıtsınalyq týrızm baǵyttary keńinen tanystyrylatynyn atap ótti.
Sonymen qatar sheteldik týroperatorlarmen, áýe kompanııalarmen, ınvestorlarmen jáne halyqaralyq medıa ókilderimen 200-ge jýyq B2B-kelissózder júrgizý josparlanyp otyr. Bul óz kezeginde 50-den astam yntymaqtastyq týraly kelisimsharttar jasaýǵa múmkindik bermek.
- Mundaı is-sharalar sheteldik týrıstik aǵyndy arttyrýǵa, halyqaralyq seriktestikti keńeıtýge jáne Almaty qalasynyń óńirlik týrıstik hab retindegi mártebesin nyǵaıtýǵa yqpal etedi. Kórmeler aıasynda Qazaqstan Respýblıkasy men sheteldik seriktester arasynda týrıstik almasýdy arttyrýǵa baǵyttalǵan yntymaqtastyq memorandýmdaryn bekitý kózdelip otyr.
Osylaısha, 2026 jyly halyqaralyq týrıstik kórmelerge qatysýǵa bólinetin qarajat qysqa merzimdi shyǵyn emes, Almaty qalasynyń týrıstik salasyn turaqty damytýǵa baǵyttalǵan strategııalyq ınvestıtsııaǵa jatady, – delingen basqarma jaýabynda.
Sondaı-aq vedomstvo ár is-sharaǵa bólingen qarjy kórme alańyn jalǵa alý, biryńǵaı ulttyq stendti ázirleý jáne bezendirý, aqparattyq jáne jarnamalyq materıaldardy daıyndaý, mýltımedııalyq kontentti usyný, sondaı-aq uıymdastyrýshylyq, tehnıkalyq jáne logıstıkalyq qyzmetterdi qamtamasyz etýge baǵyttalatynyn habarlady.
- Halyqaralyq kórmelerge Almaty qalasynyń týrıstik áleýetin tanystyrýǵa jaýapty sala mamandary qatysady. Delegatsııa quramyna qalalyq týrızm salasyna jaýapty memlekettik organnyń ókilderi, týroperatorlar, sondaı-aq halyqaralyq iskerlik seriktestermen B2B-kelissózder júrgizýge ýákiletti týrıstik ındýstrııa mamandary engiziledi. Qatysýshylar sany men quramy ár kórmeniń formaty men maqsattaryna sáıkes ońtaıly túrde qalyptastyrylyp, naqty nátıjege qol jetkizýge baǵyttalady, – delingen jaýapta.
Týrızm basqarmasy 2025 jyly Almaty qalasy 9 halyqaralyq týrıstik kórmege qatysyp, sheteldik seriktestermen 270 kelisimge qol qoıǵanyn atap ótti. Atalǵan kelisimder shamamen 224 myń sheteldik týrıst tartýǵa baǵyttalǵan.
- 2025 jyldyń qorytyndysy boıynsha Almaty qalasynyń týrıstik salasynan jergilikti bıýdjetke túsken salyq túsimderiniń kólemi 84 mlrd teńge boldy. Bul ótken jyldyń sáıkes kezeńimen salystyrǵanda 27,2%-ǵa joǵary. Týrıstik salanyń jergilikti bıýdjetke túsken jalpy salyq túsimderindegi úlesi 3,9%-ǵa jetti. Osy nátıjeler halyqaralyq kórmelerge qatysýǵa qalanyń týrıstik naryqtaǵy básekege qabilettiligin kúsheıtýge baǵyttalǵan tıimdi ınvestıtsııa ekenin kórsetedi, – dep atap ótti vedomstvo.
Eske salaıyq, buǵan deıin Almaty týrıstik áleýetin Azııa elderinde jarnamalap jatqanyn jazǵanbyz.