Sheteldik kompanııa Qazaqstanda farmzaýyt salýǵa 40 mlrd teńge ınvestıtsııa quıady

ASTANA. KAZINFORM – Densaýlyq saqtaý mınıstrliginde Qazaqstanda jańa farmatsevtıkalyq óndiris qurýdy kózdeıtin Nobel kompanııasymen iri ınvestıtsııalyq kelisimge qol qoıyldy.

Joba Memleket basshysynyń tapsyrmasy boıynsha iske asyrylyp jatyr jáne salaǵa ınvestıtsııalar tartýdyń jańa tetigin kórsetedi.

— Biz turaqty dınamıkany kórip otyrmyz: farmatsevtıka sektory 10%-ǵa ósýdi, al ınvestıtsııa kólemi 2 ese ósýdi kórsetedi. Bul jergilikti óndiristi damytý jónindegi júıeli memlekettik saıasattyń nátıjesi, — dep atap ótti Densaýlyq saqtaý mınıstri Aqmaral Álnazarova qujatqa qol qoıý barysynda.

Kelisimniń negizgi parametrleri:

* ınvestıtsııalardyń jalpy kólemi - 40 mlrd teńge

* aǵymdaǵy kelisimniń sheńberinde áleýmettik mańyzy bar 17 preparat jáne dárilik zattardyń 40 ataýy kózdelgen

* jańa óndiristiń qurylysy 2026 jyly bastalady

* óndiris GMP halyqaralyq standarttaryna sáıkes keledi

— Bizdiń mindetimiz - eldi sapaly jáne qoljetimdi dári-dármektermen qamtamasyz etý, sondaı-aq Qazaqstan óńirlik farmatsevtıkalyq habqa aınalatyn jaǵdaılar jasaý. Bul úshin barlyq qajetti zańnamalyq jaǵdaılar jasalǵan, - dep atap ótti vedomstvo basshysy.

Mınıstrlik málimetinshe, jobany iske asyrý eldiń dárilik qaýipsizdigin kúsheıtedi, eksporttyq áleýetin keńeıtedi jáne Qazaqstannyń óńirdegi farmatsevtıkalyq óndiris ortalyǵy retindegi ustanymyn nyǵaıta otyryp, jańa jumys oryndaryn ashady.

Aıta keteıik, Qazaqstanda farmatsevtıkalyq ónim shyǵaratyn 4 zaýyt salynady.

Sheteldik ınvestorlar Aqtóbede alkogolsiz sýsyn óndiretin zaýyt salady.