Sheteldik qarýly qaqtyǵystarǵa qatysqandardy ońaltý baǵdarlamasy ázirlenýi múmkin
ASTANA. KAZINFORM — Sheteldik qarýly qaqtyǵystarǵa qatysqan azamattardy áleýmettik ońaltý baǵdarlamasy ázirlenýi múmkin. Bul týraly Májilis depýtattarynyń saýalyna Іshki ister mınıstri Erjan Sádenovtiń jaýabynda aıtylǵan.
— Mınıstrlik Qazaqstan Respýblıkasy azamattarynyń sheteldik qarýly qaqtyǵystarǵa qatysqany úshin qylmystyq jaýapkershiligin jeńildetý, sondaı-aq olardyń elge oralǵannan keıin quqyqtyq, psıhologııalyq jáne áleýmettik ońaltýyna baǵyttalǵan keshendi memlekettik baǵdarlamany ázirleý jónindegi usynystaryńyzdy zerdeledi, — dedi mınıstr.
Onyń atap ótýinshe, Qylmystyq-protsestik kodekske sáıkes, Qylmystyq kodekstiń 170–172-baptary boıynsha sotqa deıingi tergep-tekserý júrgizý Ulttyq qaýipsizdik komıtetiniń quzyretine jatady. Qazirgi ýaqytta Ádilet mınıstrligi Memleket basshysynyń tapsyrmasy boıynsha múddeli memlekettik organdarmen birlesip, Qylmystyq jáne Qylmystyq-protsestik kodeksterdiń jańa redaktsııalaryn ázirlep jatyr.
— Atalǵan jumys aıasynda Eńbek jáne halyqty áleýmettik qorǵaý mınıstrligimen birlesip, kórsetilgen adamdardy áleýmettik ońaltý boıynsha keshendi memlekettik baǵdarlamany ázirleý máselesi qarastyrylýy múmkin. Sonymen birge Úkimettiń 2016 jylǵy 29 jeltoqsandaǵy № 907 qaýlysymen bekitilgen Úkimettiń zań shyǵarý jumysy qaǵıdalarynyń 4 jáne 9-tarmaqtaryna sáıkes, ortalyq memlekettik organdardyń mundaı sıpattaǵy zańnamalyq bastamalary retteýshilik saıasattyń konsýltatıvtik qujatyn ázirleýdi jáne Úkimettiń kelisilgen ustanymyn qalyptastyrýdy talap etedi. Óz kezeginde Іshki ister mınıstrligi ýákiletti organdar ázirlegen tıisti túzetýlerdi Qazaqstan Úkimetiniń nemese Parlament depýtattarynyń zańnamalyq bastamasy tártibinde qaraýǵa qatysýǵa daıyn ekenin bildiredi, — dedi Erjan Sádenov.
Buǵan deıin Májilis depýtaty Jarqynbek Amantaıuly sheteldik qarýly qaqtyǵystarǵa qatysqan Qazaqstan azamattaryna qatysty qylmystyq saıasatty izgilendirý máselesin qarastyrýdy usynǵan edi.
