Sheteldik ınvestorlarǵa jaǵdaı jasaımyz dep óndirýshilerimizdi tunshyqtyryp almaıyq – depýtat

- Memleket basshysy Qasym-Jomart Toqaev Úkimettiń keńeıtilgen otyrysynda arnaıy ekonomıkalyq aımaqtardyń qazirgi jumys tásili ózin tolyq aqtamaǵanyn ashyq aıtty. Shırek ǵasyr ishinde bul aımaqtardyń jalpy ishki ónimdegi úlesi 1 paıyzdan sál ǵana asqanyn, eksporttaǵy úlesi 0,6 paıyzdy, al sheteldik ınvestıtsııa tartýdaǵy úlesi nebári 0,9 paıyzdy quraǵanyn atap ótti. Sonymen qatar elimizdegi 18 arnaıy ekonomıkalyq jáne 69 ındýstrııalyq aımaqta 900 joba iske asyrylyp, 7,5 trıllıon teńgeden astam jeke ınvestıtsııa tartylyp, 59 myńnan astam jumys orny ashylǵany týraly kórsetkishter keltiriledi. Bul – belgili bir nátıje. Alaıda, salynǵan memlekettik qarajat pen berilgen jeńildikterdiń ekonomıkalyq qaıtarymy budan áldeqaıda joǵary bolýy tıis. Bizdiń ekonomıkaǵa jalań sandar men ádemi statıstıka emes memlekettik tabystyń naqty ósimi qajet, - dedi Quryltaı depýtaty.

Osy oraıda ol ekonomıkalyq aımaqtardyń qyzmetin túbegeıli qaıta qarap tıimdiligin arttyrý maqsatynda birqatar naqty qadamdy júzege asyrýdy usyndy.

- Birinshi, jaýapty memlekettik organdardyń jumysyn arnaıy ekonomıkalyq jáne ındýstrııalyq aımaqtarda sondaı-aq olardan tys jerlerde ashylǵan ónerkásiptik kásiporyndardyń sany boıynsha emes olardyń naqty ekonomıkalyq tıimdiligi negizinde baǵalaýdy usynamyz. Ákimdikter bıýdjet esebinen tartylǵan árbir ınfraqurylym úshin qatań ekonomıkalyq esep berýi tıis. Ekinshi, memlekettik qoldaýdy tolyq alyp keıin jumysyn toqtatqan kásiporyndardyń taǵdyryn sheshetin arnaıy komıssııa quryp olardyń óndirisin qaıta jandandyrý qajet, - dedi ol.

Onyń aıtýynsha, úshinshiden, júktelý deńgeıi tómen arnaıy ekonomıkalyq jáne ındýstrııalyq aımaqtardy zerdelep, olardyń óndiristik áleýetin arttyrý maqsatynda arnaıy ekonomıkalyq aımaqta jumys jasaýǵa ruqsat etiletin jańa Ekonomıkalyq qyzmet túrleriniń jalpy jikteýishiniń (EQJJ) ekonomıkalyq qyzmet túrlerin engizý rásimin jeńildetý qajet. Qazirgideı «sizdiń jobańyz bizdiń tizimge kirmeıdi» dep daıyn turǵan ınvestordy keri qaıtaratyn qoldan jasalǵan tıimsiz kedergilerdi joıý kerek. Osyǵan baılanysty jańa EQJJ ekonomıkalyq qyzmet túrlerin qysqa merzimde engizýge múmkindik beretin túsinikti ári ashyq tetikti ázirleý qajet.

Tórtinshiden, Arnaıy ekonomıkalyq aımaqtardaǵy jeńildikterdiń merziminiń aıaqtalýyna oraı, sońǵy 3 jylda tirkelgen jańa qatysýshylar úshin jeńildikterdi keminde 5 jylǵa uzartý múmkindigin qarastyrǵan jón.

Besinshiden, ulttyq ekonomıkanyń básekege qabilettiligin arttyrýdyń negizgi sharty retinde óńdeý ónerkásibine qajetti ınfraqurylymnyń ekonomıkalyq jáne óndiristik turaqtylyǵyn qamtamasyz etý kerek.

- Altynshydan, sheteldik ınvestorlarǵa salyqtyq jeńildikter bermes buryn dál sol salada memlekettik qoldaý alyp damyp kele jatqan ári jalpyǵa birdeı belgilengen salyq rejıminde jumys isteıtin otandyq kásiporyndardyń múddeleri men básekege qabilettiligi eskerilýin usynamyz. Sheteldik ınvestorlarǵa jaǵdaı jasaımyz dep óz óndirýshilerimizdi tunshyqtyryp almaýymyz qajet. Jetinshiden, halyqaralyq tájirıbege sáıkes, naryqtyq ekonomıkada birde-bir memleket barlyq óndiris salasynda birdeı tehnologııalyq ári básekege qabiletti kóshbasshy bola almaıdy. Sondyqtan qaıta óńdeý ónerkásibin naqty salalar boıynsha basymdyqtarymyzdy aıqyndaý maqsatynda Ulttyq ekonomıkalyq zertteý ınstıtýty aıasynda arnaıy aımaqtardy odan ári júıeli damytýǵa baǵyttalǵan biryńǵaı memlekettik tujyrymdama ázirlep bekitýdi usynamyz, - dedi Bekjan Aıtqulov.

Buǵan deıin depýtat Rábıǵa Toqseıitova Qus sharýashylyǵynyń ulttyq ǵylymı-zertteý ortalyǵyn qurýdy usynǵan edi.