Sheteldik ınvestorlar SІM-ge qandaı sırek metall kenishterin ıgerý týraly jıi usynys aıtady

ASTANA. KAZINFORM – Syrtqy ister mınıstrligi Kazinform saýalyna joldaǵan jaýabynda sheteldik ınvestorlarǵa usynatyn sırek metall kenishteriniń tizbesi bar ekenin aıtty.

«Mınıstrlikke sheteldik ınvestorlardan sırek kezdesetin metall kenishterin ıgerý jóninde usynystar jıi túsip otyrady. Tıisti jumys negizinen joǵary tehnologııalyq ónimderde, akkýmýlıatorlarda qoldanylatyn jáne oǵan qatysty qosalqy metaldardy óndirý jáne óńdeý baǵytynda júrgiziledi (lantanoıdtar tobynda kezdesetin sırek metaldar, lıtıı, volfram jáne t.b.). Búgingi tańda sheteldik ınvestorlarǵa ıgerý úshin usynylatyn birqatar ken oryndary men telimderi bar», - dep jazylǵan jaýapta.

Bul jerdegi lantanoıdtar toby degen – lantan, tserıı, prazeodım, neodım, prometıı, samarıı, evropıı, gadolınıı, terbıı, dısprozıı, golmıı, erbıı, týlıı, ıtterbıı, lıýtetsıı sııaqty 15 hımııalyq elementtiń shoǵyry. Bular sırek kezdesetin metall bolyp eseptelgenimen tabıǵatta jıi kezdesedi. Biraq jer qyrtysynda tym shashyrańqy shókkendikten ekshep, ıgerý óte qıyn. Bul elementter elektronıkada, magnıt pen optıkalyq talshyqtar óndirisinde, lazer tehnologııasynda, hımııalyq jáne ıadrolyq ónerkásipte, gaz saqtaý tehnologııasynda, bıomedıtsınada, hımııalyq sensorlarda qoldanylady.

Mınıstrliktegiler naqty qaı kenishte qandaı metaldyń qansha qor bar ekenin ashyp aıtpady.

«Bul telimderdiń basym bóligi geologııalyq barlaýdy jáne burynnan bar resýrstardy tolyq barlaýdy qajet etedi. Olardyń keıbireýlerinde otandyq kompanııalar geologııalyq barlaý jumystaryn júrgizýde. Sırek kezdesetin elementter men jer metaldarynyń keleshegi bar telimderi negizinen Qostanaı, Qaraǵandy, Shyǵys Qazaqstan, Qyzylorda (Aral óńiri) jáne Almaty oblystarynda shoǵyrlanǵan», - delingen SІM málimetinde.