Sheteldik ınvestorlar Aqtóbede alkogolsiz sýsyn óndiretin zaýyt salady
ASTANA. KAZINFORM – QR AShM men Coca-Cola Içecek Kazakhstan Aqtóbede zaýyt salý týraly ınvestıtsııalyq kelisimge qol qoıdy. Bul týraly Aýyl sharýashylyǵy mınıstrligi baspasóz qyzmeti habarlady.
Qujatqa Qazaqstan Aýyl sharýashylyǵy mınıstri Aıdarbek Saparovtyń Coca-Cola Içecek Kazakhstan kompanııasynyń bas dırektory Velı Dınchelmen kezdesýi qorytyndysy boıynsha qol qoıyldy.
Aıdarbek Saparov bul jobanyń iske asyrylýy halyqaralyq ınvestorlardyń Qazaqstanǵa degen joǵary senimin jáne eldiń tamaq ónerkásibine ınvestıtsııa salýǵa qyzyǵýshylyǵynyń artyp kele jatqanyn kórsetetinin atap ótti.
– Memleket basshysy ınvestıtsııalar tartý jáne óńdeý salalaryn damytý máselelerine basymdyq berip keledi. Búgingi kelisimge qol qoıý — buǵan deıin qol jetkizilgen ýaǵdalastyqtardyń qısyndy jalǵasy ári ınvestıtsııalyq ahýaldy jaqsartý baǵytyndaǵy júıeli jumystyń naqty nátıjesi. Sonymen qatar jobanyń Qazaqstan ekonomıkasyndaǵy eń iri ınvestorlardyń qataryna kiretin túrik jáne nıderlandtyq seriktesterdiń qatysýymen júzege asyrylatynyn erekshe atap ótkim keledi, - dedi mınıstr.
Jobaǵa salynatyn ınvestıtsııanyń jalpy kólemi 41,9 mlrd teńge. Al jańa kásiporynnyń jobalyq qýaty jylyna 280 mln lıtrge deıin alkogolsiz sýsyn óndirýge múmkindik beredi. Nysannyń qurylysyn osy jyldyń sáýir aıynda bastaý josparlanyp otyr.
Jańa óndiristik keshen Coca-Cola Içecek kompanııasynyń Qazaqstandaǵy tórtinshi zaýyty bolady jáne halyqaralyq turaqty damý standarttaryna sáıkes qaldyqtardy ekologııalyq turǵyda basqarý júıeleri men energııa tıimdi sheshimderdi qosa alǵanda, zamanaýı tehnologııalarmen jabdyqtalady.
Coca-Cola Içecek Kazakhstan kompanııasynyń bas dırektory Velı Dınchel kelisimge qol qoıý kompanııanyń Qazaqstanǵa uzaq merzimdi ınvestıtsııalar salýǵa degen berik ustanymyn rastaıtynyn atap ótti.
– Aqtóbedegi jańa zaýyt óndiris geografııamyzdy keńeıtip, jańa jumys oryndaryn ashady jáne óńirdiń ornyqty damýyna úles qosady. Qazaqstan biz úshin ósý áleýeti joǵary strategııalyq naryq bolyp qala beredi, — dedi ol.
Kezdesý sońynda mınıstr QR AShM tarapynan jobaǵa jan-jaqty qoldaý kórsetiletinin jáne ony jergilikti atqarýshy organdarmen ózara is-qımyl aıasynda súıemeldeý qamtamasyz etiletinine senim bildirdi.
Aıta keteıik, Qazaqstanda farmatsevtıkalyq ónim shyǵaratyn 4 zaýyt salynady.