Sheteldik ınvestor Bozjyra shatqalyna qonaqúı salýǵa nıetti
AQTAÝ. KAZINFORM – Bul týraly Mańǵystaý oblystyq týrızm basqarmasy habarlady. Jergilikti ákimdik óńirdiń týrıstik áleýetin damytyp, ınvestıtsııa tartý baǵytyndaǵy júıeli jumystardy jalǵastyrýda. Sonyń aıasynda, osy jyly 29 mamyrda Aqtaý qalasyna jumys saparymen sheteldik ınvestor – «Agalarov Development» kompanııasynyń negizin qalaýshy, developer Emın Agalarov bastaǵan delegatsııa kelgen.
- Óńir ákimdigi sheteldik ınvestorǵa týrızm salasyndaǵy ınvestıtsııalyq jobalardy iske asyrý úshin perspektıvaly alańdardy tanystyrdy. Kezdesý qorytyndysy boıynsha ınvestor oblystyń týrıstik ınfraqurylymyn damytýǵa qyzyǵýshylyq bildirdi. Kelissózder barysynda týrıstik áleýeti joǵary «Kendirli» kýrorttyq aımaǵynyń master-josparyn ázirleý bastamasy talqylandy, - delingen habarlamada.
Investor sonymen qatar joǵary geologııalyq, mádenı jáne estetıkalyq qundylyqqa ıe biregeı tabıǵı nysan - Bozjyra shatqalynda ekologııalyq turǵyda turaqty qonaqúı salýǵa qyzyǵýshylyq tanytqan.
- Jobanyń tujyrymdamasy nysandy tabıǵı landshaftqa úılesimdi etip, halyqaralyq ekologııalyq standarttar boıynsha salýdy kózdeıdi. Master-josparlardy ázirleý barysynda qorshaǵan ortany qorǵaý, antropogendik áserdi azaıtý, sondaı-aq jergilikti halyqtyń, sala sarapshylary, ekologtar men ǵylymı qaýymdastyq ókilderiniń pikirlerin eskerý máselelerine erekshe nazar aýdarylady. Qazirgi ýaqytta ınvestormen kelissózder jalǵasyp jatyr. Atalǵan jobalar talqylaný satysynda, - delingen oblystyq Týrızm basqarmasy taratqan habarlamada.
Buǵan deıin Mańǵystaýda Bozjyra shatqalynda vızıt-ortalyǵynyń qurylysy bastalǵanyn jazǵan bolatynbyz.