Sheteldik ınvestor Astanany Dýbaı men Sıngapýrdyń izbasary dep atady
ASTANA. KAZINFORM — Kásipker ári venchýrlyq ınvestor Baladjı Srınıvasan Qazaqstannyń álemdegi jetekshi tehnologııalyq ortalyqtardyń birine aınalýyna barlyq múmkindik bar ekenin málimdedi. Onyń aıtýyna qaraǵanda, Astana damý qarqyny jaǵynan Dýbaı men Sıngapýrdyń jetistigin qaıtalaı alady. Bul týraly Kazinform agenttiginiń Beıjińdegi menshikti tilshisi habarlady.
Baladjı Srınıvasan mundaı pikirdi kúni buryn Sıngapýrda ótken Network State Conference 2026 halyqaralyq konferentsııasynda aıtty.
Onyń sózinshe, venchýrlyq kapıtal men startaptar AQSh-tan Qazaqstandy qosa alǵanda, tehnologııalardy damytýǵa ashyq elderge aýysyp jatyr. Investor el naryǵyna kelgen ınvestorlar men kompanııalardyń qatarynda Uber jáne DoorDash-qa alǵashqylardyń biri bolyp ınvestıtsııa salǵan Shervın Pıshevardy, Polychain negizin qalaýshy Olaf Karlson-Vıdi jáne Binance krıptobırjasyn atady.
— Astana — qarqyndy damyp kele jatqan qala. Ol — kelesi Dýbaı men Sıngapýr. Astana Batysta qalyptasqan túsinikke qaramastan, sapaly ınfraqurylymdy áldeqaıda jyldam salýǵa bolatynyn dáleldep otyr. San-Frantsıskoda startaptarǵa arnalǵan ınkýbator ashýǵa bolsa, Qazaqstanda tutas bir qalany startaptar ınkýbatoryna aınaldyrýǵa bolady, — dedi ol.
Sıngapýrlyq ınvestor Qazaqstanda krıptoaktıvter shyǵarýǵa, jasandy ıntellektini damytýǵa arnalǵan derekter ortalyqtaryn salýǵa jáne halyqaralyq mamandardy tartýǵa múmkindik bar ekenin de aıtty.
— Dúnıe júziniń basqa bólikterinde mundaı jobalar qysqartylyp nemese jabylyp jatqanda, Qazaqstan sııaqty elderde, ásirese, Qazaqstannyń ózinde, olar iske qosylyp jatyr, — dedi Baladjı Srınıvasan.
Investor Qazaqstannyń negizgi artyqshylyqtary retinde el basshylyǵynyń startaptarǵa tán jyldamdyqpen jumys isteýge daıyndyǵyn, resýrstar men jerdiń qoljetimdiligin, sondaı-aq bilikti mamandardy álemniń túkpir-túkpirinen tartýǵa múmkindik beretin ıkemdi vızalyq saıasatty atady. Onyń aıtýynsha, bul AQSh-ta kóshi-qon erejeleri qatańdap jatqan kezeńde erekshe mańyzdy.
Eske salaıyq, buǵan deıin «Astana» halyqaralyq qarjy ortalyǵynda qalyptasqan quqyqtyq orta men tsıfrlyq aktıvterdi damytýǵa jasalǵan jaǵdaı sheteldik ınvestorlardyń Qazaqstanǵa qyzyǵýshylyǵyn arttyryp otyrǵanyn habarlaǵan edik.
