Sheteldik dıplomattardyń qaryzy: Qazaqstan Londondaǵy salyqty tóleı me
ASTANA. KAZINFORM – QR Syrtqy ister mınıstrliginiń resmı ókili Aıbek Smadııarov Londonda aqyly joldarmen júrgeni úshin aqsha tólemegen qaryz elshilikterdiń tiziminde ne sebepti Qazaqstan dıplomattary bar ekenin túsindirdi.
«Transport for London málimdemesine silteme jasaı otyryp, aqparat quraldarynda sheteldik elshilik qyzmetkerleri Londonnyń ortalyǵyna kirgeni úshin alym tólemegeni týraly derekter 2003-2023 jyldar aralyǵynda qarajatty qamtıtynyn habarlanǵan. 2003 jyldan bastap brıtan astanasynyń ortalyǵyna (kólikpen) kirý úshin tólem engizilgen. Qazaqstannyń Ulybrıtanııadaǵy Elshiliginiń ǵımaraty Londonnyń ortalyǵynda ornalasqan. Onda júrgizýshiler jumys kúnderi saǵat 7:00-den 18:00-ge deıin, al demalys ári mereke kúnderi saǵat 12:00-den 18:00-ge deıin kirý úshin 15 fýnt tóleýi kerek. ıAǵnı, Elshilik qyzmetkerleri óz aýmaǵyna barýyna tólem salynyp otyr. Londondaǵy sheteldik dıplomatııalyq korpýstyń – sol aýmaqtaǵy elshilikterdiń jalpy pikiri boıynsha bul tólem jergilikti salyq retinde sanalady. 1961 jylǵy Dıplomatııalyq qarym-qatynas týraly Vena konventsııasynda kórsetilgendeı, dıplomattar jergilikti salyqtan bosatylǵan», - dedi A. Smadııarov mınıstrliktegi aptalyq baspasóz máslıhatynda.
Bul turǵyda resmı ókil Londondaǵy kompanııa jarııalaǵan aqparat atalǵan alym-salyqqa qatysty ekenin, osy qarajat jol erejesin buzǵany úshin tólenetin aıyppulǵa jatpaıtynyn naqtylady.
«Basqa da elshilikter ony tóleımiz dep sheshse, onda biz de osy jaǵyn qarastyramyz. Jalpy, atalǵan konventsııaǵa sáıkes, dıplomattar salyq tólemeýi kerek. Bul óz kezeginde aıyppul emes, salyq retinde qarastyrylǵan. Osy rette, Qazaqstan ǵana emese, birqatar eldiń elshilikteri sol aýmaqta shoǵyrlanǵan. Basqa da elshilikter bul alymnyń zańsyz ekenin aıtyp otyr», - dedi Aıbek Smadııarov.
Eske salsaq, jaqynda London merııasynyń baqylaýyndaǵy brıtandyq Transport for London (TFL) memlekettik kompanııasy 20 jyl boıy aqyly joldarmen júrgeni úshin aqsha tólemegen qaryz elshilikterdiń tizimin jarııa etti. Bul rette, shet memleketterdiń elshilikteri Londonǵa 145 mln fýnt qaryz ekenin jazǵan edik. Bul tizimde Qazaqstan da bar.
Tizimniń basynda 14,6 mln fýnt qaryzben AQSh tur. Odan keıingi elderdiń qaryzy mynadaı: Japonııa — 10 mln fýnt, Úndistan — 8,5 mln fýnt, Nıgerııa — 8,4 mln fýnt, Qytaı — 7,9 mln fýnt, Reseı — 6 mln fýnt, Polsha — 5,2 mln fýnt, Gana — 5 mln fýnt.
Qazaqstan tizimde 9-orynda tur. Qaryzy – 4 652,755 (shamamen 5,9 mln dollar) fýnt.
