Sheteldik delegatsııaǵa Qazaqstannyń etno-saýyqtyrý tájirıbesi tanystyryldy
ASTANA. KAZINFORM — «Arǵymaq» at-sporttyq saýyqtyrý keshenine jumys saparymen Reseıdiń Máskeý qalasynan aýyl sharýashylyǵy mınıstri bastaǵan delegatsııa keldi, dep elorda ákimdiginiń resmı saıty.
Olarǵa dástúr, saýyqtyrý jáne etnomádenı elementterdi ushtastyrǵan keshenniń biregeı tájirıbesi tanystyryldy. Sonymen qatar, «Arǵymaq» kesheniniń qurylý tarıhy, fılosofııasy jáne saýyqtyrý múmkindikteri týraly aıtyldy.
Ásirese munda usynylatyn baǵdarlamalardyń tabıǵı ári qalpyna keltirý qasıetterine erekshe nazar aýdaryldy.
Qonaqtarǵa ulttyq mádenıettiń elementteri de kórsetildi. Atap aıtqanda, qazaqtyń qusbegilik óneri tanystyrylyp, delegatsııa tarapynan erekshe qyzyǵýshylyqqa ıe boldy. Bul kórinis tanymdyq mánge de ıe bolyp, keshenniń negizinde jatqan dástúrlerdi tereńirek túsinýge múmkindik berdi.
Sondaı-aq delegatsııa tazy ıtterin kórip, jylqylarǵa erekshe qyzyǵýshylyq tanytty. Bul janýarlar keshendegi saýyqtyrý jáne ońaltý baǵdarlamalarynyń mańyzdy bóligi bolyp sanalady.
Keshen dırektorynyń aıtýynsha, munda dástúrli tásilder men zamanaýı tehnologııalardy ushtastyrýǵa aıryqsha mán beriledi.
— Bizdiń basty ereksheligimiz — ulttyq tájirıbeni qazirgi sheshimdermen úılestirý. Arnaıy jattyǵý alańdary, jolaqtar jáne tolyq maýsymdyq jumys júıesi bar. Keshende olımpıadalyq elementter engizilgen, terapııalyq baǵyttar da damyp keledi. Biz balalarǵa kómektesemiz, ata-analary nátıjesin kórip, rızashylyqtaryn bildirip jatyr. Bala alǵash ret jylqyny kórgende onyń qyzyǵýshylyǵy oıanyp, erekshe emotsııa paıda bolady, — dedi ol.
Sonymen qatar, bıyl keshen ınfraqurylymyn damytý josparlanǵan. Jańartylǵan alańdar ashylyp, túrli jarystar ótkizý kózdelip otyr.
Sapar sońynda qonaqtarǵa aýqymdy sporttyq baǵdarlama men ulttyq sport túrleri tanystyryldy. Olardyń qatarynda kókpar, qyz qýý, teńge ilý jáne dala halqynyń mádenıeti men rýhyn aıshyqtaıtyn basqa da dástúrli oıyndar bar.
Buǵan deıin at ústindegi akrobatıka sheberi balalardy at sportyna 7 jastan bastap baýlý kerek ekenin aıtty.
