Sheteldik blogerler Dúnıejúzilik kóshpendiler oıyndaryndaǵy sport túrlerimen tanysty
ASTANA. KAZINFORM – Búgin «Qazaqstan» jeńil atletıka kesheninde 5-shi Dúnıejúzilik kóshpendiler oıyndaryn daıyndaý jáne ótkizý dırektsııasy mamandary sheteldik blogerlerge otandyq týrızmdi damytý perspektıvalary men prezentatsııasyn jáne ulttyq sport túrleri elementterin kórsetti.
Іs-sharaǵa 8 memleketten, atap aıtqanda, Taıland, Malaızııa, Qytaı, Oman, Túrkııa, Ázerbaıjan, Vetnam, Italııa jáne Qyrǵyzstannan 11 sheteldik bloger qatysty. Bul rette, QR Syrtqy ister mınıstrliginiń de tanymdyq kezdesýge muryndyq bolǵanyn atap ótken jón. Qatysýshylar arasynda malaızııalyq Nur Ruhainies Farehah, Instagram-da 1,7 mıllıon jáne TikTok-ta 738,7 myń jazylýshysy bar aktrısa ári júrgizýshi, Qytaıdan kelgen Wang Jianing, Xiaohongshu, Douyin jáne Weibo-da úlken oqyrmany bar fýd-blogerler boldy.
Іs-shara aıasynda sheteldik blogerler qazaq kúresi, qusbegilik, asyq atý, toǵyzqumalaq, mangala, ovarı, mas-restlıng jáne sadaq atý sport túrlerimen tanysty.
«Bul is-shara elimizdiń oń ımıdjin, týrıstik áleýetin jáne Dúnıejúzilik kóshpendiler oıyndaryn mıllıondaǵan sheteldik blogerler aýdıtorııasyna nasıhattaýǵa múmkindik beredi», - deıdi Dúnıejúzilik kóshpendiler oıyndaryndaǵy Mádenı, ǵylymı is-sharalardy, «Birlik kerýeni» jáne «Etnoaýyl» jobalaryn úılestirý bóliminiń bas mamany Araılym Zııat.
Túrkııa elinen kelgen bloger Kemal Kaıa kez kelgen sporttyq jarys kóptegen el halqyn jaqyndastyra túsetinin atap ótti.
«Dúnıejúzilik kóshpendiler oıyndarynyń araıly Astana qalasynda ótýi durys sheshim. Jyldan-jylǵa kórkeıip kele jatqan sulý shaharda saıysýdyń ózi mártebe. Bul rette, Qazaqstan jarysty joǵary deńgeıde ótkizetinine senimdimin», - dedi ol.
Aıta keteıik, 8-13 qyrkúıekte Astana qalasynda 5-shi Dúnıejúzilik kóshpendiler oıyndary ótedi. Іs-sharaǵa 89 elden 2000-nan astam sportshy qatysady dep josparlanyp otyr. Dúnıejúzilik kóshpendiler oıyndarynda barlyǵy 21 sport túrinen 97 medal jıyntyǵy sarapqa salynady.
