Sheteldik bilikti mamandar men ınvestorlar úshin qandaı qolaıly jaǵdaı jasalady
ASTANA. KAZINFORM — Qazaqstanǵa jumys isteýge keletin sheteldikter endi tórt kategorııaǵa bólinip qarastyrylady. Bul jóninde QR Eńbek jáne halyqty áleýmettik qorǵaý birinshi vıtse-mınıstri Erbol Tuıaqbaev málimdedi.
Ol QR Prezıdentiniń «Joǵary bilikti mamandardy, sheteldik ınvestorlardy jáne kásipkerlerdi tartý úshin qolaıly jaǵdaılar jasaý maqsatynda kóshi-qon saıasatyn jetildirý jónindegi sharalar týraly» Jarlyǵyn túsindirýge arnalǵan dóńgelek ústelde atalǵan taqyrypqa keńinen toqtaldy.
— Memleket basshysy bul Jarlyqty der kezinde qabyldady. Óıtkeni, qazir jahanda adam kapıtaly úshin báseke joǵary. Kóptegen shetel bilikti mamandardy, ınvestorlardy jáne kásipkerlerdi tartý úshin arnaıy baǵdarlamalar men mehanızmderdi engizip jatyr. Sonyń ishinde álemdik tájirıbede suranystaǵy mamandar men ınvestorlar úshin «Altyn vıza», tsıfrlyq rezıdenttik jáne elge jeńildetilgen kirý mehanızmderi keń qoldanylady, — dedi vıtse-mınıstr.
Onyń sózinshe, Qazaqstanǵa jumys isteýge keletin sheteldik azamattar endi naqty jáne qurylymdyq klassıfıkatsııa aıasynda qarastyrylady. Atap aıtqanda, negizgi tórt kategorııa bar:
• Bıznes-mıgranttar;
• Aıryqsha bilimi ne quzireti bar joǵary bilikti mamandar;
• Ortasha deńgeıdegi bilikti mamandar, ıaǵnı jumys berýshiler qazirgi júıe aıasynda tartatyn jumysshy mamandar;
• Jeke tulǵalar úı sharýashylyǵy úshin tartatyn eńbek mıgranttary.
Joǵarydaǵy ár klasqa jatatyn sheteldikter úshin ártúrli vıza rejımi engiziledi. Onda Qazaqstanǵa kirýdegi maqsaty, biliktilik deńgeıi jáne qansha ýaqyt bolatyny kórsetiledi. Sonymen birge, ınvestorlar úshin arnaıy vıza engizý qarastyrylyp jatyr.
— Bul modeldegi basty element — jumys nemese ınvestor vızasynyń merzimi ótkennen keıin, uzaq merzimdi rezıdenttik mártebesin alýǵa múmkindik bar. Ondaı jaǵdaıda sheteldik azamat QR azamatymen teń quqyqqa jáne jeńildikterge ıe bolady. Naqtyraq aıtqanda, salyq jeńildikterine, memlekettik qarjylyq (sonyń ishinde bank) qyzmetterine, densaýlyq saqtaý júıesi men bilim berý qyzmetterine, lıtsenzııalyq qyzmet túrlerine jáne t. b. múmkindikterge joly ashylady, — dedi Erbol Tuıaqbaev.
Sonymen qatar, ákimshilik rásimderdiń jeńildetilýi, ótinimderdi qaraý merzimderin qysqartý t. b. qarastyrylǵan. Vıtse-mınıstrdiń sózinshe, munyń bári sheteldik mamandar men ınvestorlarǵa qolaıly jaǵdaı qalyptastyrady.
Aıta keteıik, buǵan deıin Qazaqstanda sheteldik ınvestorlarǵa arnalǵan «Altyn vıza» engiziletinin jazǵanbyz.
