Sheteldik BAQ Toqaevtyń Shanhaıǵa saparynyń qorytyndylaryn qalaı baǵalady
ASTANA. KAZINFORM — Qazaqstan Prezıdenti Qasym-Jomart Toqaevtyń Shanhaıǵa jasaǵan sapary aıaqtaldy. Onda Memleket basshysy Dúnıejúzilik jasandy ıntellekt jónindegi konferentsııaǵa qatysyp, Qytaı Halyq Respýblıkasynyń Tóraǵasy Sı Tszınpınmen kelissózder ótkizdi. Sapar men qol jetkizilgen kelisimder Eýropa, Azııa, AQSh, Reseı jáne TMD elderiniń keminde 42 buqaralyq aqparat quralynda keńinen jarııalandy.
Reuters: Qazaqstan jasandy ıntellekt salasyndaǵy eki bastamany qatar qoldaǵan jalǵyz el
Reuters agenttigi Shanhaıda ótken Dúnıejúzilik jasandy ıntellekt jónindegi konferentsııa týraly eki kólemdi saraptamalyq materıal jarııalady. Olardyń birinde Qazaqstan AQSh-tyń AI Opportunity Statement bastamasyna da, Qytaı qurǵan Dúnıejúzilik jasandy ıntellekt salasyndaǵy yntymaqtastyq uıymyna da bir mezgilde qosylǵan jalǵyz memleket ekeni atap ótilgen. Sondaı-aq, Qasym-Jomart Toqaev BUU Bas hatshysy Antonıý Gýterrısh pen Taıland Premer-mınıstri Anýtın Chanvırakýnmen qatar konferentsııanyń negizgi sheteldik qatysýshylarynyń biri retinde ataldy.
Financial Times: Qytaı Qazaqstanmen tsıfrlyq ekonomıka jáne JI tehnologııalaryn bólisýge daıyn
Financial Times basylymynyń jazýynsha, Sı Tszınpın Qasym-Jomart Toqaevpen kezdesýde Qytaı Qazaqstannyń tsıfrlyq transformatsııasyna qoldaý kórsetý maqsatynda tsıfrlyq ekonomıka men jasandy ıntellekt tehnologııalaryn bólisýge daıyn ekenin málimdegen. Sondaı-aq, basylym Dúnıejúzilik jasandy ıntellekt salasyndaǵy yntymaqtastyq uıymynyń qurylǵanyn jáne oǵan shamamen 30 memleket qosylǵanyn habarlady.
Euronews: Qazaqstan men Qytaı 11,4 mlrd eýro kóleminde kelisimderge qol qoıdy
Euronews Qazaqstan men Qytaı jalpy quny 13 mıllıard AQSh dollarynan (11,4 mıllıard eýrodan) asatyn 70-ten astam kommertsııalyq kelisim jasasqanyn jarııalady. Olardyń qatarynda myna jobalar bar: Ortalyq Azııadaǵy alǵashqy akkýmýlıator zaýytyn CATL kompanııasymen birlesip salý; Almaty oblysynda gıdroakkýmýlıatsııalyq elektr stantsııasyn jáne Quryq portynda kópfýnktsıonaldy termınal salý.
Basylym eki el arasyndaǵy taýar aınalymynyń 49 mıllıard dollarǵa jetkenin, al Qytaı ınvestıtsııasynyń kólemi 30 mıllıard dollardan asqanyn atap ótti. Sonymen qatar, Smart Cargo platformasyn damytý, Alataý qalasyn órkendetý jáne 2027–2030 jyldarǵa arnalǵan saýda-ekonomıkalyq yntymaqtastyqtyń Jol kartasy týraly qamtyldy.
Italian.people: Sı Tszınpınniń Qazaqstan Prezıdenti Qasym-Jomart Toqaevpen kezdesýi
Italııalyq Italian.people basylymy Toqaev pen Sı Tszınpınniń kezdesýi jóninde habar taratty. Maqalada eki eldiń saýda, elektrondyq kommertsııa, energetıka, paıdaly qazbalardy óndirý jáne kólik salalaryndaǵy yntymaqtastyqty nyǵaıtýǵa, sondaı-aq tikeleı áýe reısteriniń sanyn kóbeıtýge nıetti ekeni jazylǵan.
NHK: Qytaı jasandy ıntellekt salasynda kóshbasshylyqqa umtylady
Japonııanyń NHK telearnasy Dúnıejúzilik jasandy ıntellekt salasyndaǵy yntymaqtastyq uıymyn qurý týraly kelisimge Qazaqstandy qosa alǵanda 29 memleket qol qoıǵanyn habarlady. Jańa uıymnyń shtab-páteri Shanhaıda bolady.
Telearna Qytaıdyń halyqaralyq qaýymdastyqty biriktirip, jasandy ıntellektini damytý jáne ony paıdalaný qaǵıdalaryn qalyptastyrýǵa umtylyp otyrǵanyn atap ótti.
Anadoly: Qazaqstan beıbitshilikti saqtaý úshin JI salasynda seriktesterimen yntymaqtasýǵa daıyn
Túrkııanyń «Anadoly» agenttigi Toqaevtyń konferentsııadaǵy baıandamasyna keńinen toqtaldy. Materıalda Memleket basshysynyń Dúnıejúzilik jasandy ıntellekt uıymynyń alǵashqy otyrysyn Astanada ótkizý jáne uıymnyń Ortalyq Azııadaǵy óńirlik ókildigin Qazaqstanda ashý, sondaı-aq, Qazaqstan–Qytaı tsıfrlyq kópiri» bastamasyn iske qosý usynystary qamtyldy.
Sonymen birge, jarııalanymda Toqaevtyń mynadaı bastamalary jóninde jazyldy: JI-di retteý, standarttaý jáne etıka máseleleri boıynsha turaqty halyqaralyq sarapshylar platformasyn qurý; jańa uıym aıasynda mektepter, ǵylymı ortalyqtar jáne akademııalyq áriptestik jelisin qalyptastyrý; Almatyda BUU Azııa jáne Tynyq muhıty úshin Ekonomıkalyq jáne áleýmettik komıssııasy janyndaǵy Azııa-Tynyq muhıty tsıfrlyq sheshimder ortalyǵyn ashý; kelesi jyldy Qazaqstan men Qytaıdyń JI salasyndaǵy birlesken bastamalar jyly dep jarııalaý.
Baird Maritime: Qytaı kompanııasy qazaqstandyq Quryq portynda jańa mýltımodaldy hab salady
Aýstralııalyq Baird Maritime basylymy Guoyou Materials Industry Group kompanııasynyń Quryq portynda mýltımodaldy kólik keshenin salatynyn habarlady. Bul keshen Eýropa, Ortalyq Azııa jáne Azııanyń basqa da aımaqtaryn baılanystyratyn mańyzdy logıstıkalyq torapqa aınalmaq.
Jobanyń alǵashqy kezeńi aıaqtalǵan soń, onyń júk ótkizý qabileti jylyna 15 mıllıon tonnaǵa jetedi. Jarııalanymda bul joba Qazaqstannyń eksporttyq jáne tranzıttik áleýetin arttyratyny jáne Transkaspıı halyqaralyq kólik baǵytynda Quryq portynyń mańyzyn kúsheıtetini jazylǵan.
Qazaqstan Prezıdentiniń sapary jóninde Qytaı BAQ-tary ne jazdy
China Daily Sı Tszınpınniń Qazaqstanmen strategııalyq áriptestikti odan ári nyǵaıtýǵa shaqyrǵanyn jazdy. Maqalada Qasym-Jomart Toqaev pen Sı Tszınpın Shanhaıda kezdeskeni qamtylǵan. Basylymnyń habarlaýynsha, Qytaı kóshbasshysy eki eldiń damý strategııasynyń baılanysyn nyǵaıtýdy, saýdany keńeıtýdi jáne birlesken jobalardy júzege asyrýdy jedeldetýdi usyndy.
Perspektıvaly baǵyttar retinde energetıka, paıdaly qazbalardy ıgerý, transshekaralyq elektrondyq saýda, halyqaralyq avtotasymal jáne tikeleı áýe qatynasyn keńeıtý ataldy. Sonymen birge, Sı Tszınpın Qytaı tsıfrlyq ekonomıka men jasandy ıntellekt tehnologııalaryn Qazaqstanmen bólisýge daıyn ekeni málimdedi.
Global Times: Baidu Qazaqstanda pılotsyz avtokólikter engizý múmkindigin zertteıdi
Global Times basylymy Baidu kompanııasynyń Apollo Go júrgizýshisiz taksı qyzmeti men Turlov Private Holding arasynda memorandýmǵa qol qoıylǵanyn habarlady. Taraptar Qazaqstanda pılotsyz kólik tehnologııalary men qyzmetterin engizý múmkindigin qarastyrady. Kelisim Dúnıejúzilik jasandy ıntellekt konferentsııasy alańynda jasaldy.
Atalǵan basylym málimetinshe, joba iske assa, Qazaqstan Qytaıdyń júrgizýshisiz kólik tehnologııalaryn qabyldaǵan Ortalyq Azııadaǵy alǵashqy memleket bolady. Qazirgi tańda Apollo Go qyzmeti Qytaıdyń 27 qalasynda jumys isteıdi jáne jalpy sapar sany 22 mıllıonnan asqan.
CGTN: Qazaqstan Prezıdenti Dúnıejúzilik jasandy ıntellekt konferentsııasyna qatysý úshin Shanhaıǵa keldi
Qytaıdyń CGTN telearnasy Toqaevtyń Shanhaıǵa barǵany jóninde jeke materıal daıyndady. Onda Qazaqstan JI-ge bólinetin qarjyny ulǵaıtyp, Ortalyq Azııadaǵy jetekshi tehnologııalyq ortalyqtardyń birine aınalýdy kózdegen el retinde kórsetiledi.
Materıalda Qazaqstandaǵy mynadaı bastamalar atalady: 2026 jyldyń Jasandy ıntellekt jáne tsıfrlyq damý jyly bolyp jarııalanýy, profıldik mınıstrliktiń qurylýy, JI týraly zańnyń qabyldanýy. Sonymen qatar, esepteý ınfraqurylymyn damytý josparlary baıandalady. Al negizgi jobalardyń biri retinde halyqaralyq tehnologııalyq kompanııalar men ınvestıtsııalardy tartýǵa baǵyttalǵan Data Center Valley ataldy.
Sınhýa: Sı Tszınpın Qazaqstan Prezıdentimen kezdesti
«Sınhýa» agenttigi Toqaev pen Sı Tszınpın kelissózderiniń qorytyndysynda Qazaqstan men Qytaı strategııalyq áriptestikti nyǵaıtyp, is júzindegi yntymaqtastyqty jańa deńgeıge kóterýge keliskenin habarlady.
Basym baǵyttar qatarynda transshekaralyq elektrondyq saýda, energetıka, paıdaly qazbalardy óndirý, tikeleı áýe qatynasy, halyqaralyq avtokólik tasymaly ataldy. Sonymen qatar Qytaıdyń Qazaqstanǵa tsıfrlyq ekonomıka men jasandy ıntellekt tehnologııalaryn usynýǵa daıyn ekeni jónindegi Sı Tszınpın málimdemesi qamtyldy.
Sapar jóninde TMD elderiniń BAQ-tary qandaı aqparat taratty
Reseıdiń «Interfaks» agenttigi Toqaevtyń jasandy ıntellektini retteý, standarttaý jáne etıka máseleleri boıynsha turaqty halyqaralyq sarapshylar platformasyn qurý jónindegi usynysyna nazar aýdardy. Bul bastamany Memleket basshysy Shanhaıda ótken Dúnıejúzilik jasandy ıntellekt konferentsııasynda málimdegen edi.
Sonymen qatar, basylym Toqaevtyń Dúnıejúzilik jasandy ıntellekti uıymy aıasynda mektepter, ozyq tájirıbe ortalyqtary jáne akademııalyq seriktestik jelisin qalyptastyrý qajet ekeni jónindegi usynystaryna toqtaldy. Óıtkeni, olar jas urpaqtyń tsıfrdyq qabiletterin, synı oılaýyn jáne tehnologııalarǵa degen jaýapkershiligin kúsheıtedi.
AZERTADJ: Toqaev Eýrazııanyń biryńǵaı tsıfrlyq kólik keńistigin qurýdy usyndy
Ázerbaıjannyń AZERTADJ agenttigi Qazaqstannyń Qytaıdy Ortalyq Azııamen, Kavkazben, Taıaý Shyǵyspen jáne Eýropamen baılanystyratyn negizgi kólik-logıstıkalyq torapqa aınalý jospary týraly jazdy. Materıalda Qazaqstan arqyly ótetin 13 halyqaralyq kólik dálizi, Qytaı men Eýropa arasyndaǵy temirjol júk tasymalynyń 85 paıyzy Qazaqstan arqyly júzege asatyny, Smart Cargo tsıfrlyq platformasy negizinde Eýrazııanyń biryńǵaı tsıfrlyq kólik keńistigin qalyptastyrý bastamasy atap ótildi.
Agenttik Smart Cargo platformasyna da nazar aýdardy. Ol kedendik, logıstıkalyq jáne kommertsııalyq qyzmetterdi biryńǵaı tsıfrlyq terezede biriktirýi tıis. Bul joba engizilse, Eýrazııanyń jalpy tsıfrlyq kólik keńistiginiń negizi bolady.
Fergana: Qazaqstan men Qytaı Shanhaıda quny 15 mlrd dollardan asatyn kelisimderge qol qoıdy
Ózbekstannyń Fergana basylymy Qazaqstan men Qytaıdyń jalpy quny 15 mıllıard dollardan asatyn 70-ten astam kommertsııalyq kelisimge qol qoıǵanyn habarlady. Kelisimder jasandy ıntellekt, tsıfrlandyrý, kólik, mashına jasaý, qarjy, aýyl sharýashylyǵy, logıstıka salalaryn qamtıdy.
Basym jobalar qatarynda Ekibastuzdaǵy Data Center Valley, Alataý qalasyn damytý asa mańyzdy mıneraldardy óńdeý bastamalary ataldy.
Sonymen qatar, jarııalanymdy Huawei, Geely, Li Auto jáne basqa da qytaılyq kompanııalarmen jasalǵan kelisimder qamtyldy. Bul qujattar elektr kólikterine arnalǵan ınfraqurylymdy damytý, Qazaqstanda avtokólik óndirisin jolǵa qoıý, Quryq portynda termınal salý, robototehnıka, telekommýnıkatsııa, bilim berý jáne jasandy ıntellekt salalaryndaǵy birlesken jobalardy iske asyrýdy kózdeıdi.
Aıta keteıik, buǵan deıin Qazaqstan men Qytaı máńgilik jan-jaqty strategııalyq áriptestiktiń jańa kezeńine ótkeni jónindegi saıasattanýshy pikirin jarııalaǵanbyz.
