Sheteldik BAQ-taǵy Qazaqstan: «Orta dálizdiń» bolashaǵy, AQSh-pen baılanys jáne Almatyǵa saıahat
Osy aptada sheteldik BAQ-ta Qasym-Jomart Toqaevtyń Túrkııa prezıdentimen sóıleskeni, «Orta dálizdiń» bolashaǵy, Qazaqstan men AQSh-tyń baılanysy, Malaızııamen yntymaqtastyq, CGTN aqparat agenttigi tilshisiniń Almatyǵa saıahaty jaıly maqalalar jarııalandy. Tolyǵyraq QazAqparat sarapshysynyń sholýynda.
Daily Sabah: Túrkııa men Qazaqstan prezıdentteri eki eldiń baılanysy men aımaqtyq máselelerdi talqylady
2 qazanda túrkııalyq Daily Sabah basylymy ótken dúısenbide Túrkııa prezıdenti Rejep Taıyp Erdoǵan Qazaqstan prezıdenti Qasym-Jomart Toqaevpen telefon arqyly tildeskeni jaıly jazdy. Agenttiktiń habarlaýynsha, memleket basshylary ekijaqty qarym-qatynas pen aımaqtyq jáne jahandyq máselelerdi talqylaǵan.
«Áńgimelesý barysynda eki eldiń kóshbasshylary qarasha aıynda Qazaqstanda ótetin Túrki memleketteri uıymy (TMU) sammıti aıasynda Memleket basshylary keńesiniń kún tártibine engizilýi múmkin taqyryptar boıynsha pikir almasty», - delingen Túrkııa kommýnıkatsııalar basqarmasynyń habarlamasynda.
Eske salaıyq, buǵan deıin sammıt naýryz aıynda Ankarada ótken bolatyn.
Túrki memleketteri uıymy 2009 jyly quryldy. Qazirgi ýaqytta uıymǵa Ázerbaıjan, Qazaqstan, Qyrǵyzstan, Túrkııa jáne Ózbekstan kiredi. Majarstan men Túrikmenstan baıqaýshy mártebesine ıe.
Agenda.ge: Qazaqstanda Grýzııa, Ázerbaıjan, Túrkııa, Rýmynııa ókilderimen Orta dálizdiń bolashaǵy talqylanyp jatyr
1 qazanda grýzııalyq Agenda.ge basylymy Qazaqstannyń Aqtaý qalasynda Orta dáliz jobasy jaıly jazdy. Basylymnyń habarlaýynsha, ótken jeksenbi kúni Grýzııa temir jol delegatsııasy Túrkııa, Ázerbaıjan, Qazaqstan jáne Rýmynııadan kelgen áriptesterimen birge Qytaı men Eýropany baılanystyratyn Transkaspıı halyqaralyq kólik baǵyty, logıstıka, jetkizilimder jáne tizbekter taqyrybynda jıyn ótkizgen.
«Kezdesýge qatysýshylar bıylǵy segiz aıdaǵy jumys nátıjeleri men jańa geosaıası ahýaldaǵy tasymal máselelerin talqyǵa saldy»,-dep jazady basylym.
Taraptar sondaı-aq orta dálizde tasymaldaý sharttaryn ońtaılandyrý boıynsha ózara yntymaqtastyq týraly qujatty, sonymen birge Kaspıı teńizindegi fıderlik kemeler jumysynyń turaqtylyǵyn qamtamasyz etý jónindegi kelisimdi talqylaǵan.
Eureporter: «Ekonomıkalyq kópir» salý: Qazaqstan men AQSh-tyń baılanysy damyp keledi
6 qazanda Eureporter basylymynda Qazaqstan men AQSh-tyń qarym-qatynasy, elimizdiń sheteldik ınvestıtsııa tartý jónindegi óńirlik kóshbasshy el retindegi róli jaıly maqala jarııalandy.
«2021-2022 jyldar aralyǵynda Qazaqstan men AQSh-tyń taýar aınalymy 37%-ǵa artqan, bul ekijaqty saýdanyń aıtarlyqtaı óskenin kórsetip otyr. Qazaqstannan AQSh-qa eksport 2022 jyly 1,15 mıllıard dollarǵa, al AQSh-tan Qazaqstanǵa ımport 1,9 mıllıard dollarǵa jetti. AQSh-qa negizgi eksport – mıneraldar (60,2%) men metaldar (20,3%), al negizgi ımport – kólik quraldary (30%) men mashına (26,7%)»,-delingen maqalada.
Avtordyń pikirinshe, bul ósim Qazaqstan men AQSh arasyndaǵy ekonomıkalyq baılanys berik ekenin kórsetedi. Ony 166 birlesken kásiporyn da dáleldep otyr.
New Straits Times: Malaızııanyń Eńbek mınıstrligi Saýd Arabııasy, Qazaqstan úkimetterimen birge jol qaýipsizdigi men tehnıkalyq qyzmet kórsetý boıynsha bastamalardy talqylady
4 qazanda malaızııalyq gazetNew Straits Times Malaızııanyń Eńbek mınıstri Datýk Seri Aleksandr Nanta Lınggı Saýd Arabııasy Kólik jáne jol vıtse-mınıstri Badr Bın Abdýlla ál-Dýlamımen jáne Qazaqstannyń kólik mınıstri Marat Qarabaevpen ınfraqurylym, qaýipsizdik jáne avtomobıl joldaryn kútip ustaýdy jaqsartý josparlaryn talqylaǵanyn jazdy.
«Nanta eki delegatsııamen de Pragada Jol kongresteriniń turaqty halyqaralyq qaýymdastyǵy (PIARC) uıymdastyrǵan 27-Dúnıejúzilik jol kongresi 2023 is-sharasynda kezdeskenin aıtty. Saýd Arabııasy delegatsııasymen kezdesýde ol eki eldegi jol qaýipsizdigi jáne tehnıkalyq qyzmet kórsetý aspektileri boıynsha strategııalyq yntymaqtastyqty odan ári nyǵaıtýǵa nıetti ekenin jetkizdi. Al Marat Qarabev Malaızııadaǵy port ınfraqurylymyn salý, damytý jáne basqarý salasyndaǵy tájirıbesine qyzyǵýshylyq tanytqanyn aıtqan»,-delingen basylymda.
Euronews: Germanııa men Ortalyq Azııa elderi «Orta dáliz» boıynsha qarym-qatynasty damytpaqshy
30 qyrkúıekte Euronews basylymy Germanııa kantsleri Olaf Sholts Qazaqstan, Qyrǵyzstan, Tájikstan, Túrikmenstan jáne Ózbekstan basshylarymen kezdesip, aımaqtyq jáne ekonomıkalyq yntymaqtastyqty nyǵaıtý máselelerin talqylaǵany jóninde maqala jarııalady.
«Germanııa kantsleri Olaf Sholts juma kúni Ortalyq Azııanyń bes memleketiniń basshysymen kezdesti. Berlınde Qazaqstan, Qyrǵyzstan, Tájikstan, Túrikmenstan jáne Ózbekstan basshylary óńirlik jáne ekonomıkalyq yntymaqtastyqty nyǵaıtý, sondaı-aq aımaqty Eýropamen baılanystyratyn «Orta dálizdi» damytý máselelerin talqylady»,-dep jazady agenttik.
CGTN: Almatyǵa saıahat
2 qazanda CGTN aqparat agenttigi «Almatyǵa saıahat» degen ataýmen maqala jarııalady.
Onda avtor «Almaty - Qazaqstan men búkil Ortalyq Azııa aımaǵynyń negizgi qarjy, tehnologııalyq, bilim berý, mádenı jáne kólik ortalyǵy, sondaı-aq Qytaı men Qazaqstandy baılanystyratyn mańyzdy kópir qyzmetin atqaratynyn jazady.
«Almaty «Bir beldeý, bir jol» bastamasyna eleýli úles qosady. CGTN tilshisi qalany aralap júrip, qytaılyq brendter ornalasqan kóshede akkordeonda oınaǵan mýzykanttardy kezdestirdi. Panfılovshylar saıabaǵynda týrıster Ekinshi dúnıejúzilik soǵysta qaza tapqan 28 jaýyngerdi eske alýǵa arnalǵan máńgilik alaý janynda júr. Voznesenskıı soborynyń janyndaǵy alań jergilikti turǵyndar men týrısterge toly, onyń ishinde Ortalyq Azııanyń basqa elderi men Qytaıdan kelgen týrısterdiń kógershinderdi tamaqtandyryp júrgenin kórýge bolady»,-dep jazydǵan maqalada.
