Sheteldik BAQ-taǵy Qazaqstan: mınıstrdiń AQSh telearnasyna suhbaty, Eýropadan $175 mlrd , Tájikstanǵa jeńildik
Ótken apta sheteldiń baspasózi Qazaqstannyń jasyl energetıka, tsıfrlyq júıesi týraly jazsa, bul apta Eýropalyq ınvestorlardyń elimizge oń kózqarasy, Ortalyq Azııa, onyń ishinde Qazaqstannyń tranzıt dálizi retinde áleýeti artqanyn habarlady. Sondaı-aq, qazaqstandyq sheneýnik AQSh telearnasyna suhbat berdi. Budan bólek halyqaralyq basylymdar elimizge qatysty qandaı aqparat jazǵanyna Kazinform sarapshysy sholý jasady.
Ortalyq Azııa saýda dálizine qyzyǵýshylyq artty
Sheteldik BAQ osy aptada Ortalyq Azııa elderi, onyń ishinde Qazaqstannyń saýda dálizi retinde áleýeti kúsheıgenin jazdy. voanews.com basylymynyń Vashıngtonnan habar taratqan tilshisi «orta dálizdiń paıda bolýy – Azııany Ortalyq Azııa, Kaspıı teńizi jáne Kavkaz arqyly eýropalyq naryqtarmen baılanystyratyn tranzıttik jeli Reseıdiń baqylaýyndaǵy marshrýttarǵa balama retinde tez qarqyn alyp jatyr» dep jazdy.
Basylym Transkaspıı halyqaralyq kólik marshrýty (TITR) qaýymdastyǵynyń basshysy Gaıdar Ábdikerimovtiń qyzmeti týraly baıandady. Qazir bul qaýymdastyqtyń jelisinde porttar, kemeler, temirjol men termınaldardy qosa alǵanda, 25 kólik-logıstıkalyq kompanııa bar. Sonymen qatar, oǵan 11 memleket kiredi: Ázerbaıjan, Grýzııa, Qazaqstan, Túrkııa, Ýkraına, Polsha, Rýmynııa, Bolgarııa, Lıtva, Qytaı jáne Sıngapýr.
– Munyń bári bizdiń baǵytymyzǵa qyzyǵýshylyqtyń joǵary ekenin bildiredi... Sońǵy 10 aıda baǵyt boıynsha 2,256 mıllıon tonnadan astam júk tasymaldandy. Biz tranzıttik konteınerlik poıyzdardy jetkizýdiń boljamdy ýaqytyn 38 kúnnen 19 kúnge deıin qysqarttyq, – dep keltirdi basylym Ábdikerimovtiń sózin.
Sondaı-aq, basylym «Ábdikerimovtiń keńsesi Qazaqstannyń bas qalasy Astanada ornalasqan. Munaıǵa baı respýblıka Qytaıdyń soltústik-batys shekarasynan Kaspıı teńizine deıin sozylyp jatyr, júkterdi kemelerge tıep, Kavkazdaǵy Ázerbaıjanǵa jetkizýge bolady» dep jazdy.
Aıta keteıik, Ortalyq Azııa jáne Qazaqstannyń aldaǵy baǵyty qandaı bolady? Osy jáne ózge de máselelerdi elorda tórinde jınalǵan halyqaralyq sarapshylar talqylady. Bul týraly myna jerde jazǵanbyz.
Eýroodaq elderinen Qazaqstanǵa quıylǵan ınvestıtsııa kólemi belgili boldy
Qazir Eýropalyq Odaq – Qazaqstan úshin eń iri saýda jáne ınvestıtsııalyq seriktes. Eýropadan elge quıylǵan ınvestıtsııanyń jalpy kólemi 175 mıllıard dollardan asty. Bul týraly QR premer-mınıstri Álıhan Smaıylov «Qazaqstan-Eýropalyq Odaq» dıalogtyq alańynyń 13-shi otyrysynda aıtty. Mundaı aqparatty ázerbaıjandyq trend.az jazdy.
– Atap aıtqanda, sońǵy 6 aıda Eýroodaq elderi Qazaqstan ekonomıkasyna 5,2 mıllıard dollardan astam ınvestıtsııa salǵanyn jetkizdi. Sondaı-aq, premer-mınıstr Eýropalyq Odaqtyń Qazaqstannyń syrtqy saýdasyndaǵy úlesi shamamen 30 paıyzdy quraıtynyn atap ótti. Onyń aıtýynsha, 10 aıda taraptar arasyndaǵy jalpy taýar aınalymy 34 mıllıard dollardan asty. Premer-mınıstr bul kórsetkishter saýda-ekonomıkalyq yntymaqtastyqty nyǵaıtýdyń dáıekti baǵytyn kórsetetinin atady, – dep jazdy basylym.
Sondaı-aq, trend.az Álıhan Smaıylovqa silteme jasap, qazirgi tańda Qazaqstan ekonomıkasynyń túrli salalarynda 3 myńnan astam eýropalyq kompanııa tabysty jumys istep jatqanyn, onyń ishinde Shell, Eni, Air Liquide, Alstom jáne Claas sııaqty iri transulttyq korporatsııalar bar ekenin habarlady.
Qazaqstan KPI zaýytynda polıpropılen óndirisin eki esege arttyrýdy josparlap otyr
Ýahoo.finance basylymy Reuters agenttigine silteme jasap, qazaqstandyq Qazmunaıgaz kompanııasynyń jospary týraly jazdy. Basylym kompanııanyń resmı saıtyna kirip, qyzmetine qatysty negizgi «sandar» týraly qysqa aqparat beripti.
– «QazMunaıGaz» (QMG) memlekettik mekemesi basqaratyn KPI zaýyty polıpropılen óndirisin kelesi jyly bıylǵy 188 800 tonnadan 487 500 metrıkalyq tonnaǵa deıin ulǵaıtýdy josparlap otyr... KPI aımaqtaǵy eń iri polıpropılen óndirýshisi. Osy jyldyń qańtar-qarasha aılarynda KPI 156 404 tonna polıpropılen óndirdi, onyń 138 435 tonnasy Túrkııa, Qytaı, Eýropa jáne Reseıge eksporttaldy. Ol 218 568 tonna propandy óńdedi, – dep elimizdiń polıpropılen óndirisine erekshe nazar aýdarǵan bolatyn.
Qazaqstan sırek materıaldardy jetkizýshi retinde mańyzdy ról atqara alady – mınıstr
Agroónerkásip jáne qurylys mınıstri Qanat Sharlapaev amerıkalyq CNBC telearnasyna bergen suhbatynda Qazaqstannyń mańyzdy shıkizatty Eýropaǵa kóbirek jetkize bastaǵany týraly bólisip, ArcelorMittal kompanııasymen kelisimniń sátti aıaqtalýyn talqylady.
Mınıstr basylymǵa Qazaqstan qazirdiń ózinde Eýropalyq komıssııa tizbektegen 34 sırek kezdesetin materıaldyń 18-in sátti shyǵaryp jatqanyn málimdedi.
Sondaı-aq, mınıstrden ArcelorMittal kompanııasymen jaqynda jasalǵan sátti kelisim týraly suraldy.
– Ol taraptardyń ózara kelisimi negizinde sátti aıaqtaldy. ArcelorMittal óziniń qazaqstandyq bólimshesin memleket paıdasyna satýǵa sheshim qabyldady, alaıda kompanııa jumysyn jalǵastyra beretinin atap ótken jón. Bul Ortalyq Azııa úshin biregeı bolat óndirýshi jáne kompanııanyń jylyna 4 mln tonnaǵa deıin metall ónimderin shyǵarýǵa múmkindigi bar, - dedi Qanat Sharlapaev.
Qazaqstan Tájikstanǵa temirjol júk tasymalyna jeńildikter usynady
Qazaqstan temir joly Tájikstannyń júk tasymaldaýshylaryna 30%-dan 50%-ǵa deıin jeńildikter usynyp, júk kólemin ulǵaıtýǵa járdemdesedi. Bul týraly Qazaqstannyń Tájikstandaǵy elshisi Ýálıhan Turahanov Tájikstannyń kólik mınıstri Azım Ibrahımmen kezdesýde aıtty. Bul týraly trend.az basylymy jazdy.
– Qazirgi tańda eki el arasynda bes avtomobıl baǵyty bar, al bıyl 11 aıda jolaýshylar tasymaly 5259 adamdy qurady. Kezdesýde taraptar jol-kólik salasyndaǵy yntymaqtastyqty keńeıtý josparlaryn talqylap, kólik salasynda keńeıtýge nıetterin bildirdi, – dep jazdy basylym.
