Sheteldik BAQ-taǵy Qazaqstan: Qytaımen gaz kelisimi, Qashaǵan soty, Astana áýejaıyn jańǵyrtý
Osy aptada sheteldik BAQ-ta Qazaqstan men Qytaı arasyndaǵy gaz jetkizýge arnalǵan jańa kelisimshart, Qazaqstannyń Ekologııa jáne tabıǵı resýrstar mınıstrliginiń Qashaǵan boıynsha sot protsesine qatysty málimdemesi, BAÁ-niń Terminals Holding kompanııasymen Astana áýejaıyn mýltımodaldy hab retinde damytý boıynsha yntymaqtastyq týraly kelisimge qol qoıylǵany jaıly maqalalar jarııalandy. Tolyǵyraq Kazinform sarapshysynyń sholýynda.
Reuters: Qazaqstan men Qytaı gaz jetkizý boıynsha jańa kelisimshartqa qol qoıdy
18 qazanda Reuters aqparat agenttigi Qazaqstan Prezıdenti Qasym-Jomart Toqaevtyń Beıjińge sapary kezinde qazaqstandyq QazaqGaz jáne qytaılyq Petrochina International gaz jetkizý jóninde jańa kelisimshartqa qol qoıǵanyn habarlady.
«Kompanııa saıasatyna baılanysty ózin ataýdan bas tartqan Qytaı ónerkásibiniń ókili kelisimshart qoldanystaǵy kelisimniń jalǵasy ekenin aıtty»,-delingen maqalada.
Qazaqstan birneshe jyldan beri Qytaıǵa tabıǵı gaz jetkizip keledi, degenmen ýaqyt óte kele jetkiziletin gaz mólsheri azaıdy. Bastapqyda bul tómendeý suranystyń tómendeýimen baılanysty bolsa, keıinirek ishki tutynýdyń artýy áser etken.
«Reıter agenttiginiń resmı keden derekterine negizdelgen esebine sáıkes, Qytaı 2018-2022 jyldar aralyǵynda Qazaqstannan jylyna orta eseppen 4,5 mıllıon metrıkalyq tonna nemese shamamen 6,2 mıllıard tekshe metr tabıǵı gaz ımporttalǵan», - delingen maqalada.
Reuters: Qazaqstan mınıstrligi Qashaǵandaǵy 5 mıllıard dollarǵa qatysty sot sheshimine shaǵymdandy
16 qazanda Reuters aqparat agenttigi Qashaǵan iri munaı keniishiniń operatoryna qarsy 5 mıllıard dollarlyq sot isi jaıly maqala jarııalady.
QR Ekologııa jáne tabıǵı resýrstar mınıstri Erlan Nysanbaev sot talapty qanaǵattandyrmaǵan soń mınıstrlik appelıatsııalyq shaǵym túsirgenin aıtqan.
«Astana Qashaǵandaǵy seriktes kompanııalarǵa, sondaı-aq Qarashyǵanaq gaz kondensaty ken ornyn ıgerýshi kompanııalarǵa qarsy halyqaralyq arbıtrajǵa shaǵym túsirdi», - delingen maqalada.
China Daily: Qazaqstan «Bir beldeý, bir jol» bastamasy aıasynda 1300 shaqyrym temir jol salady
China Daily gazeti 18 qazanda Beıjińge saparmen barǵan Qazaqstan Prezıdenti Qasym-Jomart Toqaevqa siltememen Qazaqstan «Bir beldeý, bir jol» bastamasy aıasynda aldaǵy úsh jylda 1300 shaqyrym jańa temirjol salatynyn jazdy.
«Qazaqstan men Qytaı halyqtarynyń múddesin, dostyq pen máńgilik strategııalyq áriptestik rýhyn basshylyqqa ala otyryp, bizdiń elimiz «Bir beldeý, bir jol» bastamasynyń joǵary maqsatyn odan ári ilgeriletedi», - dedi Qasym-Jomart Toqaev.
Anadolu Agency:Qazaqstan Izraıldi palestınalyq beıbit turǵyndarǵa qarsy «bılikti shamadan tys paıdalanýdan» aýlaq bolýǵa shaqyrady
Túrkııanyń Anadolu agenttigi 17 qazanda Qazaqstan Syrtqy ister mınıstrliginiń Izraıldegi qaqtyǵys týraly resmı málimdemesi týraly maqala jarııalady.
«Qazaqstan seısenbi kúni Izraıl bıligin palestınalyq beıbit turǵyndarǵa qarsy «bılikti proportsıonaldy emes paıdalanýdan» aýlaq bolýǵa shaqyrdy. Bul jaǵdaıda halyqaralyq quqyq normalaryn saqtaý jáne Palestına halqynyń zańdy quqyqtaryn qamtamasyz etetin BUU Qaýipsizdik Keńesiniń tıisti qararlaryn oryndaý óte mańyzdy», - delingen maqalada.
Channel News Asia: Qytaıdyń «Bir beldeý, bir jol» bastamasy Ortalyq Azııaǵa paıda ákeldi me?
Sıngapýrdyń Channel News Asia jańalyqtar arnasy 17 qazanda Qytaıdyń «Bir beldeý, bir jol» bastamasynyń Ortalyq Azııaǵa qalaı yqpal etkeni týraly maqala jarııalady.
Jańalyqtar arnasy Bri sheńberindegi jobalar qalaı júzege asyrylyp jatqanyn kórý úshin Ortalyq Azııa elderine bardy.
Qazaqstanda tilshiler «BRI - diń eń órshil jobalarynyń biri - «Qorǵas qaqpasy» ornalasqan, Qytaıdyń Qazaqstanmen soltústik–batys shekarasy boıyndaǵy strategııalyq mańyzy bar qala –Qorǵasqa bardy.
«Munda taýarlar Eýropaǵa jol tartpaı turyp, Qytaı poıyzdarynan qazaqstandyq poıyzdarǵa tasymaldanady. Sebebi, Qytaıdyń temirjol vagondarynyń ólshemi qazaqstandyq poıyzdardan tar, sondyqtan qytaılyq poıyzdar Qazaqstan joldarymen júre almaıdy», - delingen maqalada.
Agenzia Nova: Astana áýejaıyn BAÁ kompanııasy jańǵyrtady
Italııanyń Agenzia Nova basylymy 17 qazanda Qazaqstan men Emirati Terminals Holding arasyndaǵy kelisimge sáıkes Astana áýejaıy modernızatsııalanady dep habarlady.
«Qazaqstan premer-mınıstri Álıhan Smaıylov pen Birikken Arab Ámirlikteriniń Terminals Holding kompanııasy arasynda qol qoıylǵan kelisimniń arqasynda Qazaqstannyń elordasy Astana qalasynyń áýejaıy iri mýltımodaldy habqa aınalady», - delingen maqalada.
Maqalada BAÁ-niń Terminals Holding kompanııasy elorda áýejaıynyń qyzmetin jan-jaqty baǵalaýdy júzege asyryp, keıinnen jolaýshylarǵa qyzmet kórsetý sapasyn jáne jalpy áýejaıdyń tıimdiligin arttyrý úshin jedel basqarýdy óz qolyna alatyny týraly jazylǵan.
