Sheteldik BAQ-taǵy Qazaqstan: Qytaıǵa temirjol, Toqaevtan «Dostyq» ordeni, Túrkııamen áskerı yntymaqtastyq
Osy aptada sheteldik birneshe basylym Kazinform halyqaralyq aqparat agenttigine silteme jasap, Qazaqstanǵa qatysty jańalyqtardy jarııalady. Onyń ishinde Qazaqstannyń Qytaıǵa qaraı salatyn temirjoly, Túrkııamen áskerı yntymaqtastyǵy týraly jazdy. Budan bólek álemdik BAQ sheteldik ınvestorlarǵa áýejaıdy senimgerlik basqarýǵa berý, Ózbekstanmen jasyl elektr energııasyn eksporttaý týraly kelisimge kelgenin habarlady. Tolyǵyraq Kazinform sarapshysynyń sholýynan oqyńyz.
Qazaqstan Qytaıǵa aparatyn temirjol salady
wam.ae basylymy Kazinform-ǵa silteme jasap, Abaı oblysynda salynatyn jańa temirjol jelisi týraly habarlady.
Qazaqstannyń Abaı oblysy Qytaımen shekaradaǵy úshinshi temirjol ótkizý beketine aparatyn «Baqty-Aıagóz» baǵyty boıynsha uzyndyǵy 272 shaqyrym bolatyn jańa temirjol jelisiniń qurylysyn bastady. Bul týraly Kazinform habarlady... Joba tranzıt-kólik áleýetin arttyrýǵa arnalǵan. Qaıta qurylymdaý aıasynda Qytaımen shekarada úshinshi ótkizý pýnkti – Baqty-Sháýeshek ashylady, – dep jazdy ámirlikterdegi basylym.
Sondaı-aq, aqparat agenttigi «Baqty-Aıagóz» temirjol jelisi Qazaqstan men Qytaı arasyndaǵy tranzıttik ótkizý qabiletin 28 mıllıon tonnadan 48 mıllıon tonnaǵa deıin arttyrýǵa, ońtústiktegi ótkizý beketterindegi keptelisti joıýǵa jáne qosymsha tranzıt kólemin tartýǵa múmkindik beredi. Temirjol 2027 jyly paıdalanýǵa beriledi dep josparlanǵan.
Aıta keteıik, Abaı oblysynda memlekettik-jekeshelik áriptestik qaǵıdattary boıynsha jeke ınvestordyń qatysýymen iri joba júzege asyrylady dep kútilýde. Temirjol qurylysy barysynda 11 vokzal, 47 kópir, 23 temirjol jáne segiz avtomobıl ótkeli, bes jaıaý júrginshiler kópiri salynady.
Qazaqstan sheteldik ınvestorlarmen áýejaıdy senimgerlik basqarý jaıly kelissóz júrgizip jatyr
Qazaqstannyń Aqtóbe, Túrkistan jáne Qyzylorda áýejaılaryn senimgerlik basqarýǵa berý boıynsha álemniń iri ınvestorlarymen kelissózder júrgizilip jatyr. Bul týraly Interfax QR kólik mınıstri Marat Qarabaevqa silteme jasap habarlady.
Elimizdiń áýejaılarynda mýltımodaldy ortalyqtardy qurý boıynsha qajetti tájirıbesi men kapıtaly bar jeke ınvestorlardy belsendi túrde tartyp jatyrmyz. Qazirgi talqylaýlar Aqtóbe, Túrkistan jáne Qyzylorda áýejaılaryn basqarýdy tájirıbeli álemdik ınvestorlarǵa tapsyrýǵa baǵyttalǵan, – dep keltirdi mınıstrdiń sózin basylym.
BAQ-tyń málimetinshe, Astana, Almaty jáne Shymkent qalalarynyń áýejaıynda jeke ınvestorlardy tartý jumystary aıasynda ushý-qoný jolaqtaryn, janar-jaǵarmaı quıý keshenderin qaıta jańartý, sondaı-aq jolaýshylar jáne júk termınaldaryn keńeıtý jumystary kezeń-kezeńimen júrgizilip jatyr.
Qazaqstan men Ózbekstan jasyl elektr energııasyn eksporttaý týraly kelisimge keldi
Qazaqstan men Ózbekstan jasyl elektr qýatyn Ázerbaıjan arqyly Eýropaǵa eksporttaý týraly kelisimge keldi, dep habarlaıdy Azernews Ázerbaıjannyń energetıka mınıstri Parvız Shahbazovtyń ázerbaıjan-túrik ınvestıtsııalyq forýmyndaǵy sózine silteme jasap.
Ázerbaıjan mınıstri Nahchyvan arqyly Túrkııaǵa baratyn energetıkalyq dáliz boıynsha eki eldiń keńeıtilgen jumys toby qurylatynyn málimdedi.
Shahbazov aldaǵy ýaqytta Ázerbaıjan túrli baǵyt boıynsha 5000 MVt-qa deıin jasyl energııany eksporttaýdy josparlap otyrǵanyn, onyń ishinde 1000 MVt Nahchyvan Avtonomııalyq Respýblıkasy arqyly eksporttaýdy josparlap otyrǵanyn eske saldy, – dep jazdy ázerbaıjandyq basylym.
Qytaı Qazaqstannyń Kaspıı porttaryndaǵy ınfraqurylymdy zerttep jatyr
Eurasianet basylymy elimizdiń Kólik mınıstrligine silteme jasap qytaılyq Shipbuilding Industry Corp. kompanııasy Qazaqstannyń Aqtaý jáne Quryq portynda konteınerlik qondyrǵylar salý múmkindigin zerttep jatqanyn habarlady.
Mınıstrlik málimdemesinde China Railways Group Ltd. qoldanystaǵy baǵyttardy modernızatsııalaý jáne jańa temirjol jelilerin salý jobalaryna qyzyǵýshylyq tanytqany aıtylǵan. Talqylaýdan keıin ázirge naqty mámilelerge qol qoıylǵan joq, – dep jazdy basylym.
Qazaqstan men Túrkııa áskerı yntymaqtastyqty keńeıtýde senimdi túrde alǵa jyljyp keledi
jamestown basylymy Kazinform-ǵa silteme jasap, QR Qorǵanys mınıstrligi túriktiń ushqyshsyz basqarylatyn ushaqtaryn shyǵarý úshin otandyq kompanııany tańdaý protsesi júrip jatqanyn habarlady. Osylaısha, bul málimdeme Túrkııanyń Anka ushqyshsyz ushatyn apparattaryn (UUA) Qazaqstanda óndirý 2024 jyly bastalady degen buryn jarııalanǵan habardy rastap otyr.
Astana men Ankara 2022 jyldyń mamyrynda bul drondardy birlesip shyǵarý týraly kelisimge kelgen. Sol kezde Qazaqstan mashına jasaý jáne túrik aeroǵarysh ónerkásibi áskerı-tehnıkalyq saladaǵy yntymaqtastyq týraly ózara túsinistik memorandýmyna qol qoıyp, Qazaqstanda dron qurastyrý jáne tehnıkalyq qyzmet kórsetý jelisin salý josparyn jarııalady. Kelisimniń arqasynda Qazaqstan túrik jaýyngerlik ushqyshsyz ushaqtaryn shyǵaratyn alǵashqy shetel memleketi bolmaq, – dep jazdy basylym.
Qazaqstan Prezıdenti BAÁ elshisine «Dostyq» ordenin tabys etti
Qazaqstan Respýblıkasynyń Prezıdenti Qasym-Jomart Toqaev Birikken Arab Ámirlikteriniń Qazaqstandaǵy Elshisi doktor Muhammed Saıd Muhammed Ál-Alarıkıdiń ekijaqty qarym-qatynastar men yntymaqtastyq baılanystaryn nyǵaıtýdaǵy kúsh-jigerin joǵary baǵalaı otyryp, ekinshi dárejeli «Dostyq» ordenin tabys etti. Bul týraly wam basylymy jazdy.
Qazaqstannyń elordasy Astanadaǵy Prezıdent saraıynda ótken kezdesýde Qasym-Jomart Toqaev BAÁ men Qazaqstandy baılanystyratyn dıplomatııalyq jáne berik qarym-qatynastardy, BAÁ halyqaralyq deńgeıdegi ustanymyn joǵary baǵalaıtynyn málim etti, – dep jazdy basylym.
Sondaı-aq, basylymnyń málimetinshe, elshi Ál-Alarıkı mártebeli marapatty tapsyrǵany úshin Prezıdent Toqaevqa alǵys bildirdi. Ol Qazaqstan Respýblıkasyna gúldenip, órkendeı berýin tiledi jáne eki eldiń ózara múddesine saı keletin túrli saladaǵy ekijaqty baılanystardy nyǵaıtýǵa jáne damytýǵa baǵyttalǵan BAÁ men Qazaqstan basshylyǵynyń kúsh-jigerine rızashylyǵyn bildirdi.
