Sheteldik BAQ-taǵy Qazaqstan: kıik aýlaýǵa ruqsat, Orbannyń ordeni, Makronnyń strategııalyq sapary
Osy aptada álemdegi, onyń ishinde Eýropadaǵy buqaralyq aqparat quraldary Frantsııa prezıdenti Emmanıýel Makronnyń Qazaqstanǵa saparyn jarysa jazdy. Bir basylym Makronnyń kelýin «strategııalyq sapar» dese, ekinshisi «nelikten Ortalyq Azııaǵa qyzyǵyp otyr» degen taqyryppen usyndy. Al, Makronnyń ózi saparyn qorytyndylap, Tvıtterde «Qazaqstandy senimdi seriktes» dep atady. Aıtpaqshy, Makron tvıtti qazaqsha jazdy. Sondaı-aq, BAQ Qazaqstan Prezıdenti Qasym-Jomart Toqaevtyń Majarstan premeri Vıktor Orbanǵa I dárejeli «Dostyq» ordenin tabystaǵanyn jazdy. Budan bólek japonııalyq basylym elimizdegi aqbókendi aýlaýǵa ruqsat berilgenin bólisti. Kazinform sarapshysy halyqaralyq basylymdardyń elimizge qatysty jazǵan materıaldaryna sholýdy usynady.
Bul aptada Memleket basshysy Qasym-Jomart Toqaevtyń jumysy qaýyrt boldy. Astanaǵa resmı saparmen Frantsııa prezıdenti keldi, odan keıin Túrki memleketteri uıymynyń 10-shy sammıti ótti. El prezıdenti birneshe eldiń basshylarymen kezdesip, mańyzdy sharalarǵa qatysty. Mundaı kezdesýler sheteldik BAQ-tyń nazaryna ilikti.
VVS: Nelikten Frantsııa prezıdenti Ortalyq Azııaǵa qyzyǵyp otyr?
VVS «Nelikten Frantsııa prezıdenti Emmanıýel Makron Ortalyq Azııaǵa qyzyǵyp otyr» degen taqyryppen Makronnyń sapary týraly jazdy. Basylym «Bul sapar ıadrolyq jáne qazba otyndaryn Eýropaǵa jetkizý úshin aımaqtyń (Qazaqstannyń) mańyzyn bildiredi. Sapar ishinara bıznesti jandandyrý, Qazaqstan jáne Ózbekstanmen baılanysty nyǵaıtýdy kózdedi» dep keltirdi.
Budan bólek VVS Nıgerdegi áskerı tóńkeris Frantsııanyń atom ónerkásibine qaýip tóndirý múmkindigin arttyrǵannan keıin Makron Qazaqstanǵa «ýran úshin keldi» dep kórsetken.
Shyndyǵynda, bundaı úreıdiń aýqymy jóninde asyra aıtylǵan. Ótken jyly Frantsııaǵa ýran jetkizýshi elder arasynda Nıger ekinshi orynda boldy. Birinshi – Qazaqstan. Prezıdent Makron sársenbini álemdegi eń iri ýran óndirýshi el Qazaqstanda ótkizdi..., – dep jazdy basylym.
The Guardian: Emmanıýel Makron Frantsııanyń Qazaqstanmen yntymaqtastyǵyn jandandyrýǵa ýáde berdi
Al, The Guardian «Frantsııa negizinen TotalEnergies energetıkalyq kompanııalary arqyly Qashaǵan teńiz ken ornyn ıgerýdiń aýqymdy jobasyna qatysady. Sonyń arqasynda Frantsııa Qytaıdan ozyp, Qazaqstandaǵy besinshi iri sheteldik ınvestor» ekenin atady.
Munaıǵa baı Qazaqstan Eýropa elderine shıki munaı jetkizýde Reseıdiń ornyn almastyrdy jáne Qytaı-Eýropa saýda marshrýtynda mańyzdy rol atqaryp otyr. Qazaqstan – ýrannyń iri eksporttaýshysy, al frantsııalyq Orano qazirdiń ózinde «Qazatomónerkásip» memlekettik atom kompanııasymen birlesken kásiporyndy basqarady, – dep jazdy basylym.
Budan bólek Makron men Toqaev paıdaly qazbalar men energetıkadan bastap farmatsevtıka jáne aeroǵarysh salalaryna deıingi ártúrli salada birqatar kelisimshartqa qol qoıǵanyn atap ótken.
Sondaı-aq, basylym Makronnyń saparyndaǵy mańyzdy maqsattardyń biri – elimizdegi atom elektr stantsııasynyń qurylysyna qatysý dep keltirdi.
Frantsııalyq EDF energetıkalyq kompanııasy – Qazaqstandaǵy alǵashqy atom elektr stantsııasynyń qurylysyn júrgizýge úmitker. Bul joba boıynsha sheshim bıylǵy referendýmda qabyldanýy tıis. Aımaqta jetkilikti taza energetıkalyq tehnologııalar úshin mańyzdy sanalatyn mıneraldar kelissózderdiń mańyzdy bóligi boldy, – dep jazdy The Guardian.
Aljazeera: Makron Ortalyq Azııa boıynsha strategııalyq týrmen Qazaqstanǵa bardy
Basylym Frantsııa basshysynyń Qazaqstanǵa saparyn «Ortalyq Azııa boıynsha strategııalyq týr» dep jazǵan. Sonymen qatar, Makronnyń Toqaevpen kezdesýinde ekonomıka sektorlaryn, sonyń ishinde ekologııalyq taza energetıkalyq tehnologııalar, farmatsevtıka jáne aeroǵarysh ónerkásibi úshin mańyzdy paıdaly qazbalardy qamtıtyn birqatar kelisimge qol qoıylǵanyn atap ótken.
Sondaı-aq, basylym Frantsııa basshysynyń baspasóz konferentsııasynda ekijaqty áriptestik perspektıvasyna qatysty pikirin keltirgen.
Bizdiń áriptestigimiz jaqsy strategııalyq baǵytta damyp keledi, sondaı-aq ony tolyqtyrý jáne jedeldetý qajettigin kórsetip otyr, – dedi Makron Qazaqstan astanasynda ótken baspasóz máslıhatynda.
Sodan keıin «Qasym-Jomart Toqaev Frantsııany Eýropalyq Odaqtaǵy negizgi jáne senimdi seriktes dep atady jáne áriptestikke qosymsha serpin berý qajet ekenin málimdedi» degen.
Dailynewshungary: Premer-mınıstr Orban Qazaqstannyń joǵary memlekettik nagradasyn aldy
Sonymen qatar, sheteldegi BAQ osy aptada Qazaqstan Prezıdenti Qasym-Jomart Toqaevtyń Majarstan premer-mınıstri Vıktor Orbanǵa I dárejeli «Dostyq» ordenin tabystaǵanyn da jazdy. Aıta keteıik, buǵan deıin Vıktor Orbannyń elimizge ne úshin kelgenin jazǵanbyz.
Premer-mınıstr Vıktor Orban Qazaqstan Respýblıkasyna dostyq saparmen bardy. Osyǵan oraı oǵan Qazaqstan Prezıdenti Qasym-Jomart Toqaev І dárejeli «Dostyq» ordenin tabys etti. Baspasóz máslıhatynda sóz sóılegen Orban Toqaevqa Qazaqstan-Majarstan dostyǵy rýhynda berilgen memlekettik nagrada úshin alǵys bildirip, muny abyroı sanaıtynyn jáne «biz eki el arasyndaǵy turaqty yntymaqtastyqqa járdemdesý jónindegi jumysty jalǵastyramyz» dedi, – dep jazdy majarstandyq basylym.
The Japannews: Qazaqstan kıik aýlaýǵa ruqsat berdi
Budan bólek japonııalyq BAQ «el úkimeti qazirgi ýaqytta eki mıllıonǵa jýyq aqbóken bar dep málimdedi. Bir kezderi kıikterge joıylyp ketý qaýpi tóngen, biraq áli kúnge deıin Halyqaralyq tabıǵatty qorǵaý odaǵynyń Qyzyl tiziminde» dep jazdy.
Basylym QR ekologııa mınıstri Erlan Nysanbaevtyń baspasóz máslıhatynda aıtqan «aqbókender sharýashylyqtarǵa 12 mıllıard teńge zııan keltirdi» degen sózine silteme jasaıdy.
Eki ádis bar – olardy kúndiz tormen ustap, túnde atý. Men jaýaptan qashpaımyn. Bizge ekinshi nusqany da qoldanýǵa týra keledi, – dep jazdy basylym mınıstrdiń sózin.
