Sheteldik BAQ-taǵy Qazaqstan: Baıden Qazaqstanǵa kele me, Germanııaǵa munaı jetkizý jáne Úndistanǵa jańa reıster
Osy aptada sheteldik BAQ betterinde QR Prezıdentiniń Berlınge sapary, Germanııaǵa munaı jetkizý kólemin arttyrý máselesi, Memleket basshysynyń Nıý-Iorkte BUU Bas Assambleıasynyń 78-sessııasyndaǵy usynystary, Almaty men Delı arasynda ashylatyn áýe reısteri, sonymen qosa Qasym-Jomart Toqaevtyń 1 qyrkúıektegi Joldaýyna qatysty maqalalar legi jarııalandy. Tolyǵyraq QazAqparat sarapshysynyń sholýynda.
Reuters: Qazaqstan Germanııaǵa munaı kólemin jetkizýdi arttyrýǵa daıyn – Prezıdent
28 qyrkúıekte Reuters aqparat agenttigi Qazaqstan Prezıdenti Qasym-Jomart Toqaev Berlınde Germanııa kantsleri Olaf Sholtspen kezdeskeni týraly jazdy.
Basylymnyń jazýynsha, Prezıdent Toqaev kelissózderden keıin Qazaqstan Germanııaǵa munaı kólemin jetkizýdi arttyrýǵa daıyn ekenin habarlady.
Qasym-Jomart Toqaev bıyl Qazaqstan Germanııanyń Schwedt munaı óńdeý zaýytyna reseılik «Dostyq» qubyry arqyly 500 myń tonna munaı jetkizgenin aıtty. Prezıdenttiń sózinshe, Berlın reseılik munaıdy satyp alýdy toqtatý týraly sheshim qabyldaǵannan keıin Germanııaǵa Qazaqstan óz munaıyn sata bastaǵan.
«Germanııalyq dostarymyzdyń ótinishi boıynsha jetkiziletin munaı kólemin ulǵaıtýǵa, onyń uzaqmerzimdi bolýyn qamtamasyz etýge elimizdiń daıyn ekenin rastadym»,-dedi Qazaqstan Prezıdenti brıfıngte.
The Jerusalem Post: BUU Qaýipsizdik Keńesine «Orta derjavalardy» qabyldaý progreske jol ashar edi – pikir
28 qyrkúıekte ızraıldik The Jerusalem Post basylymynda BUU Bas Assambleıasynyń 78-sessııasynda QR Prezıdenti Qasym-Jomart Toqaevtyń uıymnyń Qaýipsizdik Keńesi jumysyn modernızatsııalaýǵa qatysty usynysy tóńireginde materıal jaryq kórdi.
«Geosaıası landshaftyń ózgerýi jáne jahandyq problemalardyń shıelenisip turǵan shaǵynda Birikken Ulttar Uıymy Qaýipsizdik Keńesiniń róli artyp otyr. Degenmen onyń quramy Ekinshi dúnıejúzilik soǵystan beri ózgerissiz qalyp otyr, bunyń qazirgi zamanǵa sáıkes kelmeıtini aıtylyp, synǵa kóp ushyrap jatyr. Qaýipsizdik Keńesine reforma jasaý týraly usynystar ásirese bıylǵy BUU Bas Assambleıasynda kóp aıtyldy. Máselen, Qazaqstan Prezıdenti Qasym-Jomart Toqaev Qaýipsizdik Keńesin reformalaý keregin aıtty»,-dep jazady basylym.
Keńestiń jahandyq problemalar men qaqtyǵystardy sheshe almaı otyrǵanyn alǵa tarta otyryp, Toqaev BUU Qaýipsizdik Keńesi beıbitshilik pen qaýipsizdikti saqtaýda mańyzdy ról atqara alýy úshin onyń quramynda basqa elder, sonyń ishinde Qazaqstan da bolýy kerek ekenin atap ótti.
«Amerıka Qurama Shtattary, Reseı jáne BUU Bas hatshysy Antonıý Gýterrısh te kópjaqty ınstıtýttardy modernızatsııalaý jáne qazirgi álemniń kelbetin jaqsyraq kórsetý úshin BUU Qaýipsizdik Keńesin reformalaýdyń qajettigin atap kórsetedi. Bul tek akademııalyq talqylaýlardy ǵana emes, sonymen qatar búgingi kúrdeli geosaıası ortaǵa beıimdelýdiń naqty qajettiligin kórsetip otyr»,-dep jazady maqala avtory.
Trend: AQSh Prezıdenti Djo Baıden Qazaqstanǵa kelýi múmkin
29 qyrkúıekte ázerbaıjandyq Trend agenttigi AQSh-tyń Qazaqstandaǵy elshisi Denıel Rozenblıýmge silteme jasap, AQSh prezıdenti Djo Baıden Qazaqstanǵa kelýi múmkin dep habarlady.
Basylymnyń jazýynsha, elshi Djo Baıden Qazaqstanǵa kele me ol týraly naqty aqparaty joq ekenin aıtqan, biraq mundaı múmkindikti joqqa shyǵarýǵa bolmaıdy.
«Men mundaı múmkindik bar ekenin aıtqym keledi. AQSh-tyń joǵary basshylyǵy Qazaqstan men Ortalyq Azııaǵa úlken qyzyǵýshylyq tanytyp otyr, sondyqtan mundaı sapardyń bolyp qalýy ábden múmkin», - dedi ol.
Táýelsizdik alǵaly Qazaqstanǵa Amerıka basshylary kelgen joq.
Eske salaıyq, 20 qyrkúıekte Nıý-Iorkte «S5+1» sammıti ótip, oǵan AQSh prezıdenti Djo Baıden men Ortalyq Azııa bes eliniń prezıdentteri qatysqan edi.
Modern Diplomacy: Qazaqstan ekonomıkasynyń jańa baǵyttary
Osydan bir apta buryn Modern Diplomacy basylymynda «Samuryq-Qazyna» ulttyq ál-aýqat qory» AQ basqarma tóraǵasy Nurlan Jaqypovtyń QR Prezıdenti Qasym-Jomart Toqaevtyń 1 qyrkúıektegi Joldaýyna qatysty maqalasy jarııalandy.
«Qyrkúıektiń 1-i kúni Qazaqstan Prezıdenti Qasym-Jomart Toqaev el damýynyń basym baǵyttaryn belgilegen Joldaýyn jarııalady. Prezıdenttiń eń aldymen Qazaqstan ekonomıkasynyń jańa baǵyttaryna qatysty sózi memlekettik organdardyń, sonyń ishinde eldegi kvazımemlekettik organdarǵa aıtarlyqtaı áser etedi»,-dep jazady agenttik.
Avtor Memleket basshysynyń negizgi ekonomıkalyq baǵyttaryna taldaý jasaıdy. Onyń ishinde tarıftik saıasatty qaıta qaraý máselesine, geologııalyq barlaý jumystaryna, aldaǵy bes jylǵa arnalǵan energetıka salasyndaǵy maqsattar týraly, sonymen qosa kólik jáne logıstıka salasyna keńirek toqtalyp ótken.
Caspian News: Qazaqstan azyq-túlik jetkizýshi aımaqtyq habqa aınalýǵa daıyn - Prezıdent
24 qyrkúıekte Caspian News aqparat agenttigi QR Prezıdenti Qasym-Jomart Toqaevtyń Nıý-Iorkte BUU Bas Assambleıasynyń 78-sessııasynda kótergen azyq-túlik qaýipsizdigi máselesine toqtalyp ótken.
«Biz halyqaralyq qaýymdastyqtyń azyq-túlik daǵdarystaryna tótep berý sharalaryn qarjylandyrýyna ashyq monıtorıng júrgizýdi birlesip qamtamasyz etýimiz kerek. Qazaqstan azyq-túlik jetkizýshi aımaqtyq habqa aınalýǵa daıyn. Ol úshin bizde barlyq qajetti resýrs, ınfraqurylym jáne logıstıka bar»,-dedi Prezıdent.
Basylym Qazaqstannyń astyq óndirýden álemde jetinshi orynda turǵanyn atap ótedi.
«Qazaqstannyń shamamen 202 mıllıon gektaryn nemese el aýmaǵynyń 74%-yn aýyl sharýashylyǵy jerleri alyp jatyr. Bul aýylsharýashylyq alqaptarynyń kólemi boıynsha Qazaqstandy álemdegi eń iri elderdiń birine aınaldyryp otyr. Geografııalyq ornalasýy men klımaty dándi daqyldardy ósirýge qolaıly jaǵdaı jasaıdy. Qazaqstannyń negizgi astyq óndiretin aımaqtary – Qostanaı, Aqmola jáne Soltústik Qazaqstan oblystary, sonymen qatar Shyǵys Qazaqstan, Abaı oblystary men Pavlodar qalasynda da iri óndiris jumystary júrgizilýde»,-delingen maqalada.
The Travel News Asia: Úndistandyq IndiGo áýe kompanııasy Delı men Almaty arasynda reıster ashpaqshy
25 qyrkúıekte The Travel News Asia agenttigi úndistandyq IndiGo Airlines áýe kompanııasy Delı men Almaty arasynda áýe reısterin ashqanyn habarlady. Atalmysh áýe kompanııasy osy baǵyt boıynsha aptasyna úsh ret: Delıden seısenbi, beısenbi jáne senbi kúnderi, Almatydan sársenbi, juma jáne jeksenbi kúnderi reıster oryndaıdy.
«6E 1801 reısi Delıden osy kúnderi saǵat 20:50-de ushyp shyǵyp, kelesi kúni 01:05-te Almatyǵa jetedi. Al keri baǵyttaǵy reıs 6E 1802 Almatydan saǵat 02:05-te ushyp, Delıge 05:10-da jetedi»,-dep jazady basylym.
«Biz Delıden Almatyǵa (Qazaqstan) reısterdi ashýǵa qýanyshtymyz»,-dedi IndiGo kompanııasy satý bóliminiń basshysy Vınaı Malhotra. «Almaty – Qazaqstannyń iri saýda, qarjy jáne mádenı ortalyǵy, sonymen qatar eldegi halqy eń kóp shoǵyrlanǵan jáne kosmopolıt qala. Bul jańa baǵyttyń iske qosylýy keńeıip jatqan halyqaralyq jelimizdi odan ármen nyǵaıtady, eń bastysy, Ortalyq Azııamen baılanysymyzdy arttyrady».
