Sheteldik BAQ Pıt Hegsettiń AQSh qorǵanys mınıstri bolyp taǵaıyndalýy týraly ne deıdi
ASTANA. KAZINFORM — Halyqaralyq BAQ AQSh-tyń jańadan saılanǵan prezıdenti Donald Tramptyń FOX News arnasynyń júrgizýshisi Pıt Hegsetti AQSh qorǵanys mınıstri etip taǵaıyndaýyna ártúrli baǵa berdi.
— Pıt Hegsetti óz kabınetimde Qorǵanys mınıstri etip taǵaıyndaǵanymdy jarııalaý men úshin úlken mártebe. Pıt qatal, aqyldy jáne eń bastysy «Bárinen buryn Amerıka» prıntsıpine kámil senedi, — dedi Donald Tramp.
44 jastaǵy Pıt Hegset Ulttyq gvardııanyń ardageri, Iraktaǵy jaıaý ásker ofıtseri, Aýǵanstanda kóterilisshilerge qarsy kúres jattyqtyrýshysy jáne Gýantanamodaǵy (Kýba) Nıý-Djersı armııasynyń ulttyq gvardııasynda qyzmet etti.
Hegset úılengen, jeti balanyń ákesi. Tennessıde turatyn ol 2014 jyly FOX News tilshisi retinde jumys isteı bastady. «Jaýyngerlermen soǵys» jáne «Zamanaýı jaýyngerler» bestseller kitaptarynyń avtory.
Pıt Hegsettiń áskerı nemese ulttyq qaýipsizdik salasyndaǵy basshylyq tájirıbesi bolmaǵanyna qaramastan, kandıdat retinde usynyldy.
Armııada qyzmet etken kezde Prınston men Garvard túlegi eki qola juldyz jáne jaýyngerlik jaıaý ásker belgisimen marapattaldy.
Donald Tramp Pentagon men qorǵanys álemin tań qaldyryp, Fox News arnasynyń júrgizýshisi Pıt Hegsetti qorǵanys mınıstri etip taǵaıyndap, álemdik arenada tájirıbesi joq adamdy álemdegi eń úlken jáne eń qýatty armııanyń tizginine qoıdy.
Bul jańalyq Vashıngtondaǵy kópshiliktiń alańdaýshylyǵyn týdyrdy. Óıtkeni Tramp ulttyq qaýipsizdiktiń joǵary laýazymdy tulǵalaryn taǵaıyndaýdan bas tartty.
Agenttiktiń pikirinshe, Tramptyń Pıt Hegsetti qorǵanys mınıstri etip tańdaýy áskerge túbegeıli ózgerister ákelýi múmkin.
Sonymen qatar, Agenttik Pıt Hegset áıelderdiń urystaǵy róline kúmán keltirgenin jáne áskerı qylmys jasady dep aıyptalǵan áskerı qyzmetkerlerge keshirim berýdi jaqtaǵanyn atap ótti.
44 jastaǵy Pıt Hegset, Donald Tramptyń «Bárinen buryn Amerıka» saıasatyn qoldaıtyn senimdi konservator.
— Meniń oıymsha, Tramp óziniń qorǵanys mınıstrlerimen kúresýden sharshady jáne ózine adal adamdy tańdaý kerek boldy, — dedi strategııalyq jáne halyqaralyq zertteýler ortalyǵynyń aǵa keńesshisi Mark Kansıan.
Áskerı sheneýnikter bul tańdaý kútpegen jerden jasalǵanyn aıtty. Aty-jónin atamaýdy suraǵan aǵa ofıtserdiń aıtýynsha, Pıt Hegsetti tańdaý — bıýdjeti 800 mıllıard dollardan asatyn iri vedomstvony basqarýǵa onyń tájirıbesi jete me degen alańdaýshylyq týdyrady.
Basylym Tramptyń 2016 jylǵy saılaý naýqany kezinde Pıt Hegset Donald Trampty syrtqy saıasatqa qatysty synǵa alǵanyn atap ótti.
Bastapqyda Trampty synaǵan Pıt Hegset 2016 jylǵy jalpy saılaý kezinde Tramptyń jaǵynaa shyqty jáne teledıdardaǵy onyń eń belsendi jaqtastarynyń biri boldy.
Donald Tramp pen Pıt Hegset sońǵy jyldary jaqyn qarym-qatynasta boldy.
Kapıtolııdegi birqatar respýblıkashyldar ulttyq qaýipsizdik laýazymdaryna tanymal jáne jaqsy qoldaý tapqan kandıdattardyń tiziminen keıin jarııalanǵan habarlandyrýǵa tań qaldy. Ókilder palatasynyń respýblıkalyq komıtetiniń tóraǵasy Pıt Hegsettiń tańdalǵanyna tań qalyp, onyń esimi qarastyrylatyn tulǵalardyń tiziminde joq bolǵanyn aıtty.
Donald Tramp óziniń jańa ákimshiligindegi basshylyq laýazymdarǵa adal odaqtastaryn taǵaıyndaýǵa nazar aýdarýda, dep habarlaıdy NPR.
Málimdemede ol Pıt Hegsettiń mansabyn, sonyń ishinde Fokstaǵy jumysyn joǵary baǵalap, ol óziniń «platformasyn bizdiń áskerıler men ardagerler úshin kúresý úshin» paıdalanǵanyn aıtty.
Eske salsaq, buǵan deıin Tramp Ilon Maskty úkimettik tıimdilik departamentiniń basshysy qyzmetine taǵaıyndaǵany habarlandy.
Sondaı-aq, Ilon Mask Donald Trampty qoldaý úshin 200 mıllıon dollar jumsaǵany belgili boldy.