Sheteldik azyq-túlik ónimderin satyp alý shekteledi
ASTANA. KAZINFORM — Aýyl sharýashylyǵy mınıstrligi «Ulttyq rejımnen alyp qoıýdy belgileýdiń keıbir máseleleri týraly» qaýly jobasyna ózgerister ázirledi.
Atap aıtqanda, qaýly jobasynda Qazaqstan Respýblıkasynda óndirilmeıtin taýarlardy qospaǵanda, sheteldik óndiristegi azyq-túlik taýarlaryn memlekettik satyp alý kezinde ulttyq rejımnen alyp qoıýdy belgileý kózdelgen.
Jobaǵa sáıkes, memlekettik satyp alýǵa qatysý quqyǵy tıisti tizilimge engizilgen qazaqstandyq taýar óndirýshilerge beriledi.
Sonymen qatar shekteý qoldanylatyn taýarlardyń tizbesin bekitý jáne qaýlynyń qoldanylý merzimin eki jyl dep belgileý usynylyp otyr.
Mınıstrliktiń málimetinshe, bul ózgerister eldiń konstıtýtsııalyq qaǵıdattaryn qorǵaý, qorǵanys qabileti men qaýipsizdigin qamtamasyz etý, ishki naryqty qorǵaý, ulttyq ekonomıkany damytý jáne otandyq taýar óndirýshilerdi qoldaý maqsatynda ázirlengen.
Qujat 15 maýsymǵa deıin qoǵamdyq talqylaý úshin «Ashyq NQA» portalynda ornalastyryldy.
Buǵan deıin áleýmettik mańyzy bar azyq-túlik baǵasy úshinshi apta qatarynan ózgermegeni jaıly jazdyq.
