Sheteldik azamattarǵa JSN berý tártibi ózgeredi: eResidency baǵdarlamasy iske qosyldy
ASTANA.KAZINFORM — 2026 jylǵy 1 qańtardan bastap QR shet elderdegi mekemeleri sheteldik azamattarǵa JSN berýdi toqtatady. Bul týraly Reseıdegi Qazaqstan elshiligi habarlady.
— Sheteldik azamattarǵa jeke sáıkestendirý nómirin berý jónindegi aǵymdaǵy pılottyq jobanyń qoldanylý merzimi 2025 jylǵy 31 jeltoqsandy qosa alǵanǵa deıin belgilengenin habarlaımyz.
2026 jylǵy 1 qańtardan bastap QR shet elderdegi mekemeleri sheteldik azamattarǵa JSN berýdi toqtatady.
Sonymen qatar, Qazaqstan Respýblıkasynyń ýákiletti memlekettik organdary Qazaqstan Respýblıkasyna barmaı-aq onlaın-formatta shetel azamattary úshin memlekettik qyzmetter men servısterdi alý múmkindigin, onyń ishinde JSN qamtıtyn tsıfrlyq ID-kartany alýdy kózdeıtin eResidency baǵdarlamasyn engizgenin habarlaımyz, — delingen Reseıdegi Qazaqstan elshiligi taratqan habarlamada.
Baǵdarlama sheteldikterge Qazaqstanda resmı tsıfrlyq mártebe alýǵa múmkindik beredi, ol elimizdiń bıznes-múmkindikteri men onlaın-servısterine qoljetimdilikti ashady.
Atalǵan baǵdarlama kelesi qyzmetterdi alýǵa múmkindik beredi:
* Jeke sáıkestendirý nómiri (JSN) bar tsıfrlyq ID-kartany alý;
* Qor naryqtaryna, krıpto bırjalarǵa, Qazaqstandyq nómiri bar eSIM-ge qol jetkizý;
* Elektrondyq tsıfrlyq qoltańbany jáne saqtandyrý qyzmetterin resimdeý;
* Qazaqstandyq kartalardy paıdalana otyryp, onlaın banktik shottar ashý;
* Barlyq tólem qyzmetteriniń salyqtyq rezıdenttigin jáne ekvaırıngin alý múmkindigi.
Joǵaryda aıtylǵandardyń negizinde, shetel azamattaryna JSN alý máseleleri boıynsha barlyq tolyq aqparat qoljetimdi bolatyn resmı saıtyna júginý usynylady.
Aıta ketelik SQO-da shetel azamattaryna zańsyz JSN berý derekteri anyqtaldy.