Sheteldik azamattarǵa QR-kody bar týrıstik kartalar taratyldy
ASTANA. KAZINFORM — QR-kody bar týrıstik kartalar sheteldik azamattardyń qaýipsizdigin arttyrýǵa yqpal etedi, dep habarlaıdy QR Іshki ister mınıstrliginiń baspasóz qyzmeti.
«Zań jáne tártip» tujyrymdamasy aıasynda ishki ister mınıstrliginiń bastamasymen kóliktegi polıtsııa departamentiniń qyzmetkerleri Astana qalasynyń halyqaralyq áýejaıynda sheteldik azamattardy aqparattandyrýǵa baǵyttalǵan aktsııa ótkizdi.
Іs-shara barysynda «Omby — Astana» áýe reısimen kelgen týrısterge QR-kody bar týrıstik kartalar taratyldy.
Kóliktegi polıtsııa departamenti kóshi-qon qyzmeti basqarmasy bastyǵynyń orynbasary Erlan Toǵyzbaevtyń aıtýynsha, mundaı týrıstik kartalar Qazaqstan Respýblıkasyna kireberiste, halyqaralyq áýejaılarda jáne temirjol vokzaldarynda úlestiriledi.
Onyń sózinshe, týrıstik kartalar arqyly sheteldik qonaqtar Safetravel.kz portaly men mobıldi qosymshasyna qol jetkize alady. Atalǵan resýrsta polıtsııa, jedel járdem, qutqarý qyzmetteri, taksı qyzmetteri men baılanys operatorlarynyń baılanys nómirleri, sondaı-aq kóshi-qon esebine qoıý tártibi men jeke qaýipsizdikke qatysty usynymdar qazaq, orys, aǵylshyn jáne qytaı tilderinde usynylǵan. Bul sheteldik azamattarǵa qajetti aqparatty jedel alyp, qajet bolǵan jaǵdaıda tıisti kómekke júginýge múmkindik beredi.
Sonymen qatar kóshi-qon qyzmetiniń mamandary týrısterge Qazaqstan Respýblıkasynyń kóshi-qon zańnamasynyń talaptaryn da túsindirdi.
— Negizgi maqsatymyz — qoǵamdyq tártipti saqtaı otyryp, azamattar men sheteldik qonaqtardyń qaýipsizdigin qamtamasyz etý, sondaı-aq olardyń elimizde qaýipsiz ári jaıly jaǵdaıda bolýyna jaǵdaı jasaý, — dedi Erlan Toǵyzbaev.
Departamenttiń kóshi-qon qyzmeti usynǵan málimetke sáıkes, jyl basynan beri kóliktegi polıtsııa qyzmetkerleri QR-kody bar 211 myńnan astam týrıstik kartany taratqan.
Sheteldik azamattardy aqparattandyrý jáne súıemeldeý jumystary turaqty negizde júrgizilip, olardyń qaýipsizdigin qamtamasyz etýge baǵyttalǵan.
Osyndaı is-sharalar Almaty, Shymkent, Túrkistan, Aqtaý jáne Óskemen qalalarynyń áýejaılarynda da ótkizildi.
Budan buryn Qazaqstannyń týrıstik maýsymy naýryzda ótetin eki mańyzdy is-sharamen ashylatynyn jazdyq.