Sheteldik áýe kompanııalary Qazaqstannyń iri qalalaryna shekteýsiz usha alady
Sheteldik áýe kompanııalary 5-shi dárejeli «áýe erkindigi» bar otandyq birqatar áýejaıǵa shekteýsiz usha alady. Bul týraly QR Kólik mınıstrliginiń Azamattyq avıatsııa komıteti málim etti, dep habarlaıdy Kazinform.
Qazaqstan Kólik mınıstrligi Básekelestikti qorǵaý jáne damytý agenttigimen birlesip, áýe kóliginiń qoljetimdiligi men damýy úshin qazaqstandyq áýe tasymaldar naryǵynyń tartymdylyǵyn arttyrý maqsatynda «ashyq aspan» rejımin odan ári jetildirip jatyr. Atap aıtqanda, mınıstrlikpen «ashyq aspan» rejımin engizý týraly buıryqqa sheteldik áýe kompanııalaryna 5-shi dárejeli «áýe erkindigin» paıdalaný quqyǵyn berý arqyly buryn-sońdy qoldanysta bolǵan shekteýlerdi alyp tastaýǵa baǵyttalǵan ózgerister engizildi.
Osylaısha, sheteldik áýe kompanııalary Qazaqstannyń birqatar áýejaıyna áýe kemeleriniń tıpteri men jıiligine qaramastan, onyń ishinde baǵyttar boıynsha shekteýsiz 5-shi dárejeli «áýe erkindigimen» ushýlardy oryndaý múmkindigine ıe boldy. Qolǵa alynǵan bul is-sharalar básekelestikti arttyrýǵa múmkindik berip, óz kezeginde áýe bıletteriniń qunyn tómendetýge jáne ushý geografııasyn keńeıtýge yqpal etedi dep kózdelip otyr.
Aıta keterligi, «Ashyq aspan» rejımi Astana, Almaty, Shymkent, Aqtaý, Aqtóbe, Qaraǵandy, Túrkistan, Óskemen, Pavlodar, Kókshetaý, Taraz, Petropavl, Semeı qalalarynyń áýejaılarynda qoldanylady.
