Sheteldik áskerıler elde tildik kýrstardy aıaqtaǵany týraly sertıfıkat aldy
ASTANA. KAZINFORM — Qazaqstannyń Ulttyq qorǵanys ýnıversıteti sheteldik tyńdaýshylar úshin qazaq jáne orys tilderi boıynsha qarqyndy kýrstar uıymdastyrdy, dep habarlaıdy Qorǵanys mınıstrliginiń baspasóz qyzmeti.
Kýrsty támamdaǵan túlekterge sertıfıkattar tabystaý rásimine AQSh-tyń Qazaqstandaǵy elshisi Djýlı Stafft, Frantsııanyń Qazaqstandaǵy elshiligi janyndaǵy áskerı attashe polkovnık Rober Azeman jáne Túrkııanyń Qazaqstandaǵy áskerı attashesi polkovnık Mýjdat Bektash shaqyryldy.
Saltanatty is-sharaǵa qatysýshylardy QR Ulttyq qorǵanys ýnıversıtetiniń bastyǵy general-maıor Baýyrjan Ábjanov qarsy aldy. Ol oqytýshylar quramyna kásibıligi men oqytý ádistemesin tereń meńgergeni úshin shynaıy alǵysyn bildirdi. Sonyń arqasynda tyńdaýshylar oqý baǵdarlamasyn tabysty ıgergenin atap ótti.
— Tildik daıarlyq — zamanaýı áskerı qyzmetshini qalyptastyrýdyń ajyramas bóligi. Tildik kýrs olardyń kásibı múmkindikterin keńeıtedi. Sonymen birge halyqaralyq deńgeıde tıimdi ózara is-qımyldy qamtamasyz etip, ózara qurmet pen senimge negizdelgen syndarly dıalog ornatýǵa yqpal etedi, — dep atap ótti ol.
Óz kezeginde AQSh elshisi Djýlı Stafft ýnıversıtet basshylyǵyna oqytýdy uıymdastyrǵany úshin alǵys bildirdi. Ol maıor Ebıgeıl Blaýnt Qazaqstan Respýblıkasy Ulttyq qorǵanys ýnıversıtetinde tildik baǵdarlamany meńgergen AQSh Qarýly kúshteriniń alǵashqy áskerı qyzmetshisi ekenin atap ótti. Elshiniń pikirinshe, bul oqıǵa áskerı bilim berý salasyndaǵy yntymaqtastyqty nyǵaıtýǵa septigin tıgizedi.
Ulttyq qorǵanys ýnıversıtetinde orys tili boıynsha qarqyndy kýrstardan Túrkııanyń áskerı qyzmetshileri — aǵa leıtenanttar Demır Kaan, Nýsret Kodor, sheber-serjant Serdar Bınzeofıtser jáne Frantsııa Qarýly kúshteriniń ofıtseri maıor Frederık Gallýa bilim aldy.
Sonymen qatar Túrkııanyń úsh áskerı qyzmetshisi qazaq tili boıynsha kýrstyq baǵdarlamany meńgerdi. Olar — aǵa leıtenanttar Vahıt Elalmysh, Melıh Balkash jáne aǵa serjant Hýseın Efe.
Budan buryn qazaqstandyq áskerı qyzmetshiler BUU-nyń 7 mıssııasynda mindetin atqaryp júrgenin jazdyq
