Sheteldikterge Qazaqstannan bala asyrap alý sharttary qatańdatyldy
ASTANA. QazAqparat - Qazaqstan bıligi sheteldikter úshin elimizden bala asyrap alý sharttaryn qatańdatyp, ony óz azamattarymyz úshin birshama ońtaılandyrdy. Bul týraly búgin Astanada ótken baspasóz máslıhatynda QR Bilim jáne ǵylym mınıstrligi Balalar quqyqtaryn qorǵaý komıtetiniń tóraıymy Raısa Sher aıtty.
Onyń aıtýynsha, buryn qazaqstandyq azamattar bala asyrap alý úshin 20-ǵa jýyq qujat jınaıtyn bolsa, jańa zańnama boıynsha nebári 8 qujat jetkilikti. Sondaı-aq, bala asyrap alý úderisine jumsalatyn ýaqyt da edáýir, 6 aıdan 3 aıǵa azaıtylǵan.
Degenmen, mamannyń aıtýynsha, jańa zańnama boıynsha bizdiń elimizden bala asyraýǵa nıet bildiretin sheteldik azamattarǵa qoıylatyn talaptar kúsheıtildi. Sondaı-aq, bala asyrap alý quqyǵy joıylatyn adamdar sanaty da belgilendi.
«Mundaı adamdardyń qatary birshama keńeıtildi. Burynǵy bar tizimge dástúrli emes seksýaldyq baǵyttaǵylar, jazasyn tolyq ótemegender jáne jalǵyzbasty er adamdar engizildi. Sonymen qatar, jas shamalaryna baılanysty da birqatar ózgerister engizildi», - dep atap ótti R.Sher.
