Sheteldikterge Qazaqstandaǵy týrıstik nysandardy kóp nasıhattaý kerek - Kazakh Tourism
ASTANA. QazAqparat - «Kazakh Tourism» Ulttyq kompanııasy» AQ basqarma tóraǵasynyń orynbasary Tımýr Dúısenǵalıev Qazaqstandaǵy týrızmniń damý qarqyny jóninde áńgimeledi, dep habarlaıdy QazAqparat tilshisi.
Onyń aıtýynsha, sheteldik saıahatshylardyń kópshiligi Qazaqstannyń týrıstik jerlerinen habarsyz.
«Qazaqstanda vızalyq máseleler ońymen sheshilip keledi, áýe qatynastary da damý ústinde. Devalvatsııadan keıin týrıster úshin anaǵurlym arzan elge aınaldyq. Sonda da saıahatshylardyń tolassyz legin kórip otyrǵan joqpyz. Sebebi, halyq Qazaqstannyń týrıstik jerlerinen habarsyz, Qazaqstanǵa saıahattaýǵa bolatynyn bilmeıdi. Bizdiń qazirgi jumysymyz - sol aqparattyq vakýmdy toltyrý bolyp otyr. Qazaqstan degende munaı men gazdy ǵana elestetpeı, týrızmi damyǵan, bıznes jasaýǵa qolaıly el dep qabyldaýlary qajet», - dedi Tımýr Dúısenǵalıev Astanada Qazaqstannyń iskerlik týrızmine arnalǵan jınalysta.
Kompanııa ókiliniń aıtýynsha, sońǵy ýaqytta Astana men Almaty qalasyna keletin týrısterdiń sany artqan jáne Qazaqstanda iskerlik týrızm men ekotýrızmdi tıimdi damytýǵa bolady.
«Bir kezderi Qyrǵyzstan men men Ózbekstanǵa qaraǵanda, Qazaqstandaǵy demalys qymbatyraq bolatyn. Qazir úsh eldiń baǵasy teńesti. Almatynyń besjuldyzdy qonaqúıinde toptyq tarıf - 35 myń teńge. ıAǵnı, 100 dollarǵa qala ortalyǵyndaǵy eń úzdik qonaqúıde demalýǵa bolady. Alakólde úsh mezgil tamaqtandyratyn shıpaly demalys aımaqtary - 8-12 myń teńge. Saıahatshylar taǵy qaı jerde 20-25 dollarǵa tolyqqandy demala alady? Kóptegen saıahatshy bul týraly bilmeıdi. Qyzylorda oblysyndaǵy Jańaqorǵanda óte tartymdy baǵaǵa tolyq emdelip shyǵýǵa bolady. Osynyń barlyǵyn taýarǵa aınaldyrý kerek, qolaıly jaǵdaı jasaý kerek. Onyń ústine, Qazaqstannyń ornalasqan jeri óte tıimdi. Eger Ózbekstan ejelgi qalalarymen mádenı týrızmniń ortalyǵy atansa, Qazaqstan - iskerlik jáne ekotýrızmdi damyta alady. Sebebi, bıznes-týrıst orta eseppen 300-500 dollar qaldyratyn eń tıimdi saıahatshy», - dedi T. Dúısenǵalıev.
