Sheteldikterge Qazaqstan azamattyǵyn zańsyz berýdi uıymdastyrǵan arna anyqtaldy

ALMATY. QazAqparat – Sheteldikterge Qazaqstan azamattyǵyn zańsyz berýdi uıymdastyryp kelgen arna anyqtaldy, dep habarlaıdy QazAqparat QR Ulttyq qaýipsizdik komıteti Shekara qyzmetine silteme jasap.

«2022 jylǵy 13 qazanda UQK Shekara qyzmeti Almaty qalasynyń prokýratýrasymen birge Qazaqstan aýmaǵy arqyly Aýǵanstan azamattaryn zańsyz ótkizý arnasynyń jolyn kesti.

UQK Shekara qyzmeti «Boran» arnaıy bólimshesin jumyldyra otyryp ótkizgen jedel-izdestirý is-sharalary barysynda Ortalyq Azııa elderiniń biriniń jalǵan tólqujatyn usynǵan sheteldik azamatty 1,5 myń AQSh dollary somasyndaǵy aqshany alý kezinde ustady.

Tintý barysynda qazaqstandyq birneshe uıymnyń mórleri, Aýǵanstannyń 20 tólqujaty, týý týraly kýálikter men QR azamattyǵy men elde turýǵa yqtııar hat alýǵa, tirkelýge jáne elde bolý merzimin uzartýǵa negiz bolatyn basqa da qujattar alyndy», - delingen habarlamada.

Atalǵan fakti qylmystyq belgileri boıynsha sotqa deıingi tergep-tekserýlerdiń biryńǵaı tizilimine QR Qylmystyq kodeksiniń 394-baby 1-bóligi (Zańsyz kóshi-qondy uıymdastyrý) boıynsha tirkeldi.

Ustalǵan kúdikti Almaty qalasy Polıtsııa departamentiniń ýaqytsha ustaý ızolıatoryna qamaldy.

Foto: gov.kz