Sheteldikterdiń Qazaqstan azamaty arqyly jerge ıelik etýi múmkin be

NUR-SULTAN. QazAqparat – Qazaqstandyqtar arqyly sheteldikterdiń jerge ıelik júrgizý yqtımaldyǵyn Jer komıssııasy qosymsha talqylaýy kerek. Memleket basshysynyń keńesshisi Erlan Qarın «Habar-24» arnasyndaǵy «Suhbat» baǵdarlamasynda osyndaı oı aıtty, dep habarlaıdy QazAqparat tilshisi.

«Ol endi Jer komıssııasynyń quzyrynda. Jer komıssııasynyń quramyna túrli qoǵam qaıratkerleri, aýyl sharýashylyǵymen aınalysyp jatqan kásipkerler, memleketik organdardyń ókilderi bar. Senbi saıyn ótip júrgen otyrystarda sol komıssııa músheleri jerge qatysty týyndaıtyn barsha máseleni pysyqtap, talqylap, osydan tıisti sheshimderdi qabyldaıdy. Biraq jerdi sheteldikterge satýǵa jáne jalǵa berýge birjola tyıym salynady. Prezıdent usynǵan zań jobasynyń aıasynda osydan týyndaıtyn basqa da normalar bar. Sheteldikterdiń qandaı da bir qatysýymen múmkindik beretin joldardyń bárine osy zań normasymen tyıym salynatyn bolady», - dedi Erlan Qarın.