Sheteldikterdiń elimizge kelý tártibi men shet memleketterden jumys kúshin tartýǵa baılanysty 1,5 myń zańbuzýshylyq anyqtaldy
Bul týraly búgin jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov málim etti, dep habarlaıdy QazAqparat.
Ol keltirgen derekter boıynsha, tekserý barysynda anyqtalǵan zańsyz áreketter negizinde 1 qylmystyq, 232 ákimshilik is qozǵalǵan. Sondaı-aq zań buzýshylyqtardy joıý jóninde quzyrly organdarǵa 83 usynys engizilip, 4 narazylyq keltirilgen. Prokýrorlyq qadaǵalaý aktileri boıynsha 211 zańsyz mıgrant eline qaıtarylyp, 92 sheteldik jumys kúshin tartýǵa ruqsat beretin 88 qujattyń kúshi joıyldy. Sondaı-aq taǵy 217 mamanǵa qatysty 212 ruqsattyń quzyryna shekteý qoıyldy.
Resmı ókildiń sózine qaraǵanda, sheteldik kompanııalar tarapynan jiberilgen zańsyzdyqtar túrli máseleler boıynsha oryn alyp otyr. Aıtalyq, olardyń biri qazaqstandyq mamandardy jumysqa qabyldaýda joǵary biliktilik deńgeıin talap etkenimen, ózderiniń biliktiligi múldem tómen qyzmetkerlerin jumysqa alǵan. «Mysaly, «Planým Kıpr Lımıted» kompanııasy qazaqstandyqtardan ınjener mamandyǵy boıynsha joǵary bilimdi talap etip, ol qyzmetke pedagog mamandy alǵan. Al «ÝzDeýServıs» JShS-niń ókilderi dánekerleýshi qyzmetine ornalasý úshin qazaqstandyqtarǵa 5 jyl eńbek ótili bolýy qajet degen talap qoıa turyp, osy qyzmetke eshqandaı eńbek ótili joq Ózbekstan azamatyn alǵan. Al respýblıkanyń keıbir aımaqtarynda sheteldik kompanııa ıeleri jergilikti turǵyndar úshin jańa jumys oryndaryn ashý, olardy oqytý nemese qaıta oqytý, jáne jergilikti mamandarmen sheteldik jumysshylardyń oryndaryn almastyrý jónindegi talaptardy oryndamaǵan» dedi N.Súıindikov.
