Sheteldikterdiń Almatyda jumys isteýge ruqsat alýy jeńildeıdi
ALMATY. QazAqparat - Elimizde sheteldik mamandardyń jumysqa ornalasýǵa ruqsat alý tártibi jeńildeıdi, dep habarlaıdy QazAqparat tilshisi. Bul týraly 200 sheteldik kompanııanyń qatysýymen ótip jatqan konferentsııada aıtyldy.
Sheteldik mamandardyń qujat tapsyrý protsesi 3 aıdan 30 kúnge deıin qysqartyldy. Kandıdattardy izdestirý boıynsha bos jumys oryndaryn basylym betinde jarııalaý toqtatyldy. Qujat tapsyrý operatsııasy tolyǵymen elektrondy formatqa kóshti. Sheteldik mamandar elicense.kz arqyly qujat tapsyra alady.
«Bilikti sheteldik mamandardy tartý básekege qabiletti ekonomıkany qamtamasyz etý úshin kerek. Konferentsııa sheteldik sarapshylardyń másele kóterip, memlekettik organ ókilderine usynys berýi úshin uıymdastyrylǵan. Memlekettik organdar men ınvestorlar arasynda ashyq ári senimdi qarym-qatynas ornap jatyr», - dedi Work Permits Kazakhstan kompanııasynyń dırektory Danııar Ibragımov.
Sondaı-aq, Alataý aýdanynda kóshi-qon qyzmet kórsetý ortalyǵy ashyldy. Onda salyqtyq, banktik, mekemearalyq qyzmetter kórsetiledi. Sonymen qatar, medıtsınalyq tekserýden ótip, saqtandyrý polısin rásimdeýge, JSN alýǵa bolady. Dál osyndaı ortalyqty Naýryzbaı aýdanynda ashý josparlanyp otyr.
Bıyl Almatyda sheteldik ınvestorlar men mamandardy tartý úshin 6 myńǵa jýyq kvota bólingen. Qurylys salasy, qonaq úı bıznesi, munaı-gaz ónerkásibi men qaladaǵy saýdanyń damýyna Túrkııa, AQSh, Kanada, Ońtústik Koreıa, Batys jáne Shyǵys Eýropadan mamandar shaqyryldy. Qazir qalada shetel kapıtaly men jumysshy kúshi bar 14 myń kásiporyn jumys isteıdi. Qalada 45 myń shetel azamaty turyp jatyr.
Qytaı men Úndistannan kelgen týrıster úshin Almaty halyqaralyq áýejaıy arqyly tranzıtten ótkennen keıin 72 saǵatta elden ketý jáne kelý tártibi jumys isteıdi. Almatydaǵy 90 qonaq úı men jataqhanalarda sheteldikterdi onlaın tirkeýge bolady.
Budan bólek, elimizge týrısterdiń kelý tártibi de jeńildegen. Elde 45 memlekettiń azamattary 30 kún vızasyz júre alsa, 48 elden kelgen shetel azamattaryna tirkeý anyqtamasy birden beriledi. Reseı, Belarýs jáne Qyrǵyzstan eliniń azamattary elge kelgen soń 30 kún, ýkraınalyqtar 90 kún tirkelmeı júre alady.
