Sheteldikterdi jumysqa zańsyz alǵan SQO-nyń 32 turǵyny jaýapqa tartyldy
PETROPAVL. QazAqparat – Soltústik Qazaqstan oblysynda 32 turǵyn sheteldikterdi zańsyz jumysqa alǵany úshin aıyppul tóledi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, óńirde 6 myńǵa jýyq shetel azamaty jáne azamattyǵy joq 255 adam turady.
Halyqtyń kóshi-qon zańnamasynyń keıbir erejelerin bilmeýi búginde máselege aınalǵan. Osyǵan baılanysty kóshi-qon qyzmetiniń qyzmetkerleri sheteldik týystary qonaqqa kelgen jaǵdaıda, 3 jumys kúni ishinde kóshi-qon qyzmetin habardar etý qajet ekenin oblys turǵyndarynyń esterine salady.
Elektrondyq-tsıfrlyq qoltańba bolǵan jaǵdaıda, vızalyq kóshi-qon portaly arqyly, olardy úıden shyqpaı-aq tirkeýge bolady.
Shet memleket azamatynyń elimizde ýaqytsha bolý merzimi asyp ketip, ol uzartylmasa nemese QR shyqpasa, kelýshimen birge qabyldaýshy tarap ta
jaýapkershilikke tartylady. Alty aıdyń ishinde atalǵan normalardy 293 soltústikqazaqstandyq buzǵan.
«Jarty jyldyń ishinde bizdiń burynǵy 15 otandasymyz azamattyqtaryn aýystyrǵandyǵy jóninde ýaqtyly habarlamaǵan. Olar 30 kúntizbelik kúnnen keshiktirmeı shetel azamattyǵyn alǵandyǵy týraly habarlaýy jáne qazaqstandyq qujattaryn QR ishki ister organdaryna ne sheteldik mekemelerge tapsyrýy qajet. Atalǵan normany oryndamaǵany úshin ákimshilik jaýapkershilik qarastyrylǵan», - deıdi SQO PD kóshi-qon qyzmeti basqarmasynyń bastyǵy Talǵat Ábilov.
Qazaqstan Respýblıkasynda bolý erejelerin elimizge kelgen 219 qonaq buzǵan. Zańdy birneshe ret buzǵan 24 sheteldik shekaradan shyǵaryldy.
Sondaı-aq, sheteldikterdi jumysqa zańsyz alǵan SQO-nyń 32 turǵyny jaýapkershilikke tartyldy. Basqa el azamattary kóbine jeke tulǵalardyń úılerine jumysqa ornalasady.
Azamattardy qujattandyrý boıynsha da jumys jalǵasqan. Bıyl jeke kýálik ázirleýge 24 myńnan astam, tólqujatqa 8 myńnan astam ótinish resimdeldi. Ótinishterdiń bireýin osy kúnge deıin qolynda eski úlgidegi tólqujaty ǵana bar SQO-nyń 54 jastaǵy turǵyny bergen. Kóshi-qon qyzmetiniń qyzmetkerleri QR azamattyǵyn anyqtaý boıynsha qajetti sharalar qabyldady. Jyl basynan eski úlgidegi tólqujatpen ne múlde qujatsyz júrgen 66 soltústikqazaqstandyqtyń quqyqtyq mártebesi retteldi.
