Sheteldikterdi jumysqa tartýǵa arnalǵan kvotaǵa ózgeris engiziledi
NUR-SULTAN. QazAqparat - Úkimettiń sheteldik jumys kúshin (ShJK) tartýǵa arnalǵan kvotany belgileý qyzmetin halyqty jumyspen qamtý máseleleri jónindegi ýákiletti organǵa berý usynylady. Bul týraly Parlament Májilisinde kóshi-qon protsesterin retteý máseleleri boıynsha ózgerister engizý týraly zań jobasy tanystyrý barysynda QR Eńbek jáne halyqty áleýmettik qorǵaý vıtse-mınıstri Aqmádı Sarbasov málim etti, dep habarlaıdy QazAqparat tilshisi.
Onyń sózine qaraǵanda, syrtqy eńbek kóshi-qony salasyndaǵy zańnama tıisti ózgerister men tolyqtyrýlarǵa áser etti.
«Birinshiden, el ekonomıkasyna shetel ınvestıtsııalaryn tartý protsesine jumyldyrylǵan jumys berýshiler men ınvestorlardyń qajettiligine jedel den qoıý úshin, Úkimettiń sheteldik jumys kúshin (ShJK) tartýǵa arnalǵan kvotany belgileý jónindegi fýnktsııalaryn halyqty jumyspen qamtý máseleleri jónindegi ýákiletti organǵa berý usynylady. Ekinshiden, ekonomıkalyq qyzmet túrlerin alyp tastap, sheteldik jumys kúshin tartýǵa kvotalardy belgileý kezinde sanattar boıynsha bólý usynylady», - dedi vıtse-mınıstr.
Úshinshiden, sheteldik jumys kúshin tartý rásimin jetildirý jáne ınvestorlar úshin qolaıly jaǵdaılar jasaý maqsatynda sheteldik jumys kúshin tartýǵa ruqsattyń áreketin basqa ákimshilik-aýmaqtyq birlikterge taratý kózdelip otyr. Bul rette jumys berýshi ruqsatta kórsetilgen árbir óńirdiń bıýdjetine salyq alymyn tóleýge, sondaı-aq tıisti óńirlerde jumystardy oryndaý jáne qyzmetterdi kórsetý týraly sharty bolýǵa tıis.
«Tórtinshiden, qoldanystaǵy zańnamaǵa sáıkes, bizdiń Mınıstrlik arqyly beriletin biliktiliginiń sáıkestigi týraly anyqtamasy boıynsha joǵary bilikti sheteldikter óz betinshe jumysqa ornalasa alady. Sońǵy 3 jylda barlyǵy 11 adam ótinish bildirip, tıisti anyqtamalar alǵan. Osyǵan baılanysty, bul quzyretti jergilikti atqarýshy organdardyń deńgeıine berý usynylady. Besinshiden, shaǵyn kásipkerlik sýbektileri eńbekshi kóship kelýshilerdi tıisti ruqsat almaı zańsyz qyzmetke tartý faktileriniń kóp kezdesýine baılanysty, aıyna 8 AEK salyq alymdaryn tóleý arqyly ShJK-ny tartýdyń qoldanystaǵy tetigine sáıkes, eńbekshi kóship kelýshilerdi «maýsymdyq jumysshylarǵa» teńestirýdi usynamyz. Bul rette, maýsymdyq jumysshylarǵa jumysqa qabyldanýy úshin kásipter tizbesi anyqtalady», - dedi A. Sarbasov.
