Sheteldikter tarapynan qazaq tilin úırenýge degen suranys joǵary - muǵalim

ASTANA. QazAqparat – Búgin elordadaǵy «Til-Qazyna» ulttyq ǵylymı-praktıkalyq ortalyǵynda qazaq tilin úırenýde qoldanylatyn tıimdi ádis-tásilder talqylandy, dep habarlaıdy QazAqparat tilshisi.

Jıynǵa til mamandary, oqý ortalyqtarynyń basshylary men qazaq tilin úırenip júrgen 20-ǵa jýyq túrli ult ókilderi qatysty. Basqosýda memlekettik tilde sóıleý, jazý daǵdylaryn úıretetin kompıýterlik baǵdarlamalar men mobıldi qosymshalar tanystyryldy.

«Qazaqsha úıren» oqý ortalyǵynyń basshysy Aıgúl Daden qazirgi tańda ózge ult ókilderi tarapynan qazaq tilin úırenýge degen suranystyń joǵary ekenin jetkizdi.

«Bul ortalyqty ashýymyzdyń sebebi – suranystyń joǵary bolýy. Bastapqyda biz shákirtterdi onlaın oqyttyq. Keıin Astana qalasyndaǵy bilim alýshylardy oflaın formatta oqytýǵa kóshtik. Qazirgi kezde barlyq ult ókilderi qazaqsha úırenedi, suranys óte kóp. Tipti, Reseıden kelip oqyp jatqan azamattar men laýazymdy tulǵalar da bar. Eki jyldyń ishinde 2500-den astam azamat bilim aldy. Biraq bizde negizinen mektep oqýshylary kóp», - dedi «Qazaqsha úıren» oqý ortalyǵynyń basshysy.

Onyń aıtýynsha, búgingi tańda qazaqsha úırenýge ózge el azamattary da nıet bildire bastaǵan. Máselen, Chehııa, Brazılııa, AQSh jáne Frantsııada júrip, qazaq tilin úırenip jatqandar bar.